لاہور (رپورٹنگ آن لائن) لاہورکی مقامی عدالت نے یوٹیوبرڈکی بھائی کی اہلیہ سے رشوت لینے والے این سی سی آئی اے کے 6افسران کا جسمانی ریمانڈ منظور کر لیا گیا۔
جوڈیشل مجسٹریٹ نعیم وٹو نے تین صفحات پرمشتمل تحریری حکم جاری کیا،فیصلے میں کہاگیا ہے کہ درخواست گزار نے ایف آئی اے کودرخواست کی کہ تفتیشی شعیب ریاض اورسرفراز چوہدری نے ریلیف کے نام پر رشوت مانگی۔درخواست گزار نے افسران کودی گئی تمام رقم سے متعلق تفصیلات بتائیں، اس میں کوئی شک نہیں کہ درخواست میں کرنسی نوٹ کی نوعیت،وقت اور تاریخ درج نہیں، عروب جتوئی نے یوٹیوبر کے بھائی ضیاء الرحمان کو بطورگواہ پیش کیا،تفتیشی نے دونوں سے تمام تفصیلات، چیکس کی تصاویر قبضے میں لیں۔
عروب جتوئی نے بیان دیا کہ یہ افسران این سی سی آئی اے کے اعلیٰ عہدیداروں کو ماہانہ بھی دیتے ہیں، فیصلے میں لکھا گیا ہے کہ تفتیشی نے انکوائری میں بتایا کہ یہ نیٹ ورک بڑے پیمانے پر کام کررہا ہے، تفتیشی نے ملزمان سے رقم کی برآمدگی کے لئے جسمانی ریمانڈ کی استدعا کی۔ملزمان کے خلاف پرائیویٹ شکایت کنندہ کی صورت میں میٹریل موجود ہے،تفتیش مکمل کرنے کے لئے ملزمان کا ریمانڈ دیا جانا ضروری ہے،ملزمان کا تین روزہ جسمانی ریمانڈ منظورکیا جاتا ہے۔
