اسلام آباد(رپورٹنگ آن لائن)نگراں وزیر صحت ڈاکٹر ندیم جان نے کہا ہے کہ ڈرگ ریگولیٹری اتھارٹی (ڈریپ)نے ادویات کی قلت کی شکایات کے موثر ازالہ کیلئے احسن اقدام اٹھایا ہے،
عوام کو معیاری اور محفوظ ادویات کی بلاتعطل فراہمی ہماری ترجیح ہے، مختصر مدت میں ایک مربوط اور جامع پلان کے ساتھ عوام کو سہولت فراہم کرنے کی کوشش کریں گے، ملک کی ترقی اور عوام کی بہتری کا ایجنڈا اور مشن لے کر آیا ہوں۔ ان خیالات کا اظہار انہوں نےڈریپ کی نئی موبائل ایپلی کیشن کے افتتاح کے موقع پر کیا جس میں ادویات کی دستیابی اور کسی بھی دوائی کی قلت کی صورت میں شہریوں کی شکایات موصول ہونے کے بارے میں معلومات فراہم کی گئی ہیں۔
افتتاحی تقریب سے خطاب کرتے ہوئے وفاقی وزیر نے کہا کہ شہری اس ایپ کے ذریعے ادویات سے متعلق اپنی شکایات ڈرگ ریگولیٹری اتھارٹی آف پاکستان (ڈریپ)کے پاس جمع کرا سکتے ہیں جو آج سے فعال ہو جائے گی۔انہوں نے کہا کہ یہ موبائل ایپ 24گھنٹے دستیاب ہو گی جس سے شہریوں کی شکایات کا بروقت ازالہ ممکن ہو گا،یہ شکایات ملک بھر میں متعلقہ ڈرگ انسپکٹر کو بھجوائی جائیں گی۔
ڈاکٹر ندیم نے کہا کہ اس موبائل ایپ کی مدد سے لوگوں کو ادویات کی قلت اور دیگر متعلقہ مسائل کے بارے میں معلومات حاصل ہوں گی،اس ایپ کے ذریعے ادویات کی قلت یا دستیابی کے بارے میں درست ڈیٹا بھی شیئر کیا جائے گا۔وفاقی وزیر نے کہا کہ اس اقدام سے ملک میں استعمال ہونے والی ادویات کی طلب و رسد کے درمیان فرق کی مناسب نگرانی میں بھی مدد ملے گی۔
انہوں نے کہا کہ یہ موبائل ایپ شہریوں اور ریگولیٹرز کے درمیان رابطے کو بھی بہتر بنائے گی۔انہوں نے کہا کہ ڈریپ کو ریگولیٹری اتھارٹی ہونے کے ناطے شہریوں کے حقوق کے تحفظ کے لئے ان کی خواہشات کے مطابق بنانے کی کوشش کی جائے گی۔ انہوں نے یقین دلایا کہ ڈریپ کو بین الاقوامی ریگولیٹری اتھارٹیز کے معیار کے مطابق بنایا جائے گا۔
انہوں نے کہا کہ حکومت شہریوں کے لئے محفوظ اور معیاری ادویات کی دستیابی کو یقینی بنائے گی۔نگراں وفاقی وزیر نے کہا کہ مثالی ریگولیٹری اتھارٹی وہ ہوتی ہے جو عوام کے حقوق کے تحفظ کیلئے اصلاحات کو یقینی بنائے۔ انہوں نے کہا کہ ہر دوائی جان بچانے والی بن جاتی ہے جب کسی بیماری کیلئے استعمال ہو۔
