بیجنگ (رپورٹنگ آن لائن) رواں سال چین کے 15ویں پانچ سالہ منصوبے کا آغاز ہو رہا ہے۔ اس وقت چین میں جاری نو روزہ جشن بہار کی تعطیلات بیرونی دنیا کے لیے کھپت اور معیشت کو فروغ دینے کے لیے چین کی کوششوں کا مشاہدہ کرنے کا اچھا موقع فراہم کرتی ہیں۔
جشن بہار سے پہلے چین کی وزارت تجارت سمیت نو محکموں نے مشترکہ طور پر 2026 کی “ہیپی شاپنگ فار دی اسپرنگ فیسٹیول” نامی خصوصی مہم کا آغاز کیا، جس میں تعطیلات کی کھپت کو فروغ دینے کے لیے پالیسی پیکجز کا ایک سلسلہ متعارف کرایا گیا، تاکہ ملکی طلب کو فروغ دیا جا سکے اورملکی صارفین کے ساتھ ساتھ غیر ملکی سیاحوں کوبھی بہترین فوائد مل سکیں۔
چین کی وزارت تجارت کے اعداد و شمار کے مطابق، اسپرنگ فیسٹیول کی تعطیلات کے پہلے چار دنوں کے دوران، چین میں اہم ریٹیل اور کیٹرنگ اداروں کی اوسط یومیہ سیلز میں 2025 کی اسی مدت کے مقابلے میں 8.6 فیصد کا اضافہ ہوا ہے۔ تعطیلات کے پہلے تین دنوں کے دوران، وزارت تجارت کی زیر نگرانی 78 اہم خریداری کے علاقوں میں سیاحوں کی تعداد اورکاروباری ٹرن اوور میں گزشتہ سال کی اسی مدت کے مقابلے میں بالترتیب 4.5 فیصد اور 4.8 فیصد کا اضافہ دیکھنے میں آیا۔ ٹریول پلیٹ فارمز کے ڈیٹا سے پتہ چلتا ہے کہ جشن بہار کے دنوں میں چین کے لیے فلائٹ بکنگ میں سال بہ سال 400 فیصد سے زیادہ اضافہ ہوا ہے۔
مثال کے طور پر، شنگھائی میں تعطیلات کے دوران ہوائی اڈوں پر مسافروں کی آمد و رفت میں مسلسل اضافہ ریکارڈ کیا گیا، اور ان کی یومیہ اوسط تعداد ایک لاکھ 13 ہزارتک جا پہنچی ہے۔ اس سال جنوری میں، بیجنگ کیپیٹل انٹرنیشنل ایئرپورٹ کسٹمز نے بیرون ملک جانے والے مسافروں سے ٹیکس واپسی کی 7,966 درخواستوں کو پروسیس کیا، جس کی کل مالیت تقریباً 125 ملین یوآن تھی، جو سال بہ سال بالترتیب 469.81 فیصد اور 43.68 فیصد کا اضافہ ہے۔
مزید اہم بات یہ ہے کہ چونکہ چین اپنے دروازے مسلسل کھول رہا ہے اور ٹیرف کم کر رہا ہے، تو مزید اعلیٰ معیار کی عالمی مصنوعات چینی نئے سال کی خریداری کا حصہ بن رہی ہیں اور چینی مصنوعات اور خدمات دنیا کو بھی فائدہ پہنچا رہی ہیں۔ ہسپانوی ریڈیو اور ٹیلی ویژن کارپوریشن کی ویب سائٹ پر ایک تبصرے میں کہا گیا ہے کہ سست اور غیر یقینی عالمی اقتصادی بحالی کے پس منظر میں، چینی نیا سال نہ صرف عالمی کھپت کو بڑھانے کا ایک اچھا موقع ہے، بلکہ سرحد پار تجارت اور سروس انڈسٹری کی ترقی کو فروغ دینے میں بھی مدد کر رہا ہے، جو”عالمی معیشت کو فروغ دینے کے لیے ایک اہم عنصر بن گیاہے۔
