شہباز اکمل جندران۔۔۔
پنجاب حکومت کی تشکیل کردہ اعلی سطحی کمیٹی نے ایکسائز ٹیکسیشن اینڈ نارکوٹکس کنٹرول ڈیپارٹمنٹ لاہور میں 4 ہزار 397 گاڑیوں کی مشکوک اور بوگس رجسٹریشن کے مقدمے میں اینٹی کرپشن کی کارکردگی پر سوالیہ نشان لگا دیا ہے۔
صوبائی سیکرٹری ایکسائز ٹیکسیشن اینڈ نارکوٹکس کنٹرول ڈیپارٹمنٹ پنجاب کے احکامات کے تحت تشکیل پانے والی کمیٹی کے سربراہ گریڈ 20 کے ڈائیریکٹر جنرل نارکوٹکس کنٹرول پنجاب مسعود الحق جبکہ ممبران میں گریڈ 19 کے ڈائیریکٹر ایکسائز فیصل آباد، احمد سعید، گریڈ 19 کے ہی ڈائیریکٹر انفورسمنٹ اینڈ آڈٹ ایکسائز مشتاق احمد فریدی اور گریڈ 18 کے ڈپٹی ڈائریکٹر انفورسمنٹ اینڈ آڈٹ ایکسائز عاصم امین شامل رہے۔
کمیٹی نے اپنی رپورٹ میں قرار دیا ہے کہ اینٹی کرپشن نے ایکسائز ڈیپارٹمنٹ کے گریڈ 19 اور 18کے پانچ ڈائریکٹروں ،رضوان اکرم شیروانی، سہیل ارشد، عمران اسلم، رانا قمر الحسن اور محمد آصف سمیت دیگر کے خلاف 4 ہزار 397 گاڑیو ں کی مشکوک اور بوگس رجسٹریشن اور ان گاڑیوں کی دستاویزات کی سکیننگ نہ کرنے کے حوالے سے مقدمہ انتہائی جلد بازی میں درج کیا ہے۔
کمیٹی کی رپورٹ میں بیان کیا گیا ہے کہ لاہور میں سالا نہ اوسطا”6 لاکھ گاڑیاں رجسٹرڈ ہوتی ہیں۔جن کے ڈاکیومنٹس کی سکیننگ ڈائیریکٹر کی ذمہ داری میں شامل نہیں ہوتی۔اس کے باوجود ڈائریکٹروں کے خلاف مقدمہ درج کیا گیا ہے۔جو سمجھ سے بالاتر ہے۔
کمیٹی کا کہنا تھا کہ ڈیٹا انٹری آپریٹر، انسپکٹر اور ڈائیریکٹر کو کسی بھی قانون، ضابطے یا ایس او پیز کے تحت گاڑیوں کے کاغذات کی سکیننگ کا ذمہ دار نہیں ٹھہرایا جا سکتا۔
رپورٹ میں مزید بیان کیا گیا ہے کہ اینٹی کرپشن کی تحقیقاتی ٹیم نے 4 ہزار 397 گاڑیوں میں سے کسی ایک بھی گاڑی کی ویری فکیشن نہیں کی۔ایسے میں ان گاڑیوں کو بوگس کیسے قرار دیا جاسکتا ہے۔
رپورٹ میں کہا گیا ہے کہ محکمے نے گاڑیوں کی دستاویزات کی سکیننگ کا عمل 2009 میں شروع کیا اور مئی 2018 میں A Hamson نامی کمپنی سے سکیننگ کا معاہدہ کرلیا گیا۔
صوبائی حکومت کی تشکیل کردہ اعلی سطحی کمیٹی کی رپورٹ کے بعد اینٹی کرپشن کے گریڈ 17 کے افسر کی رپورٹ کی روشنی میں درج کی جانے والی ایف آئی آر سوالیہ نشان کی زد میں ہے۔
