اسلام آ باد (رپورٹنگ آن لائن ) وفاقی وزیر داخلہ شیخ رشید نے کہا ہے کہ ای وی ایم ہی دھاندلی کوروکنے کا ذریعہ ہے، پارلیمنٹ کے مشترکہ اجلاس کے فیصلے کا پتا چل جائے گا ، پوری امید ہے اتحادی ہمارے ساتھ چلیں گے ، پی ڈی ایم قانون ہاتھ میں نہیں لے گی تواچھے طریقے سے ملیں گے ، صوبوں کامسئلہ بھی ہوتومظاہرین اسلام آباد آجاتے ہیں ، پولیس کی سیاست نہیں کرتا،معلوم نہیں ہوتا سی سی پی اوکون ہے ، سیاستدانوں اوراداروں کواپنا اپنا کام کرنا چاہیے، اسلام آباد پولیس کی ذمہ داریاں زیادہ ہیں ، میرٹ پرمزید بھرتیاں کریں گے ، اسلام آباد میں فرانزک لیب نہیں ، رواں سال فرانزک لیبارٹری کاکام شروع ہوجائےگا۔
پیر کو وفاقی وزیر داخلہ شیخ رشید احمد نے تقریب سے خطاب کرتے ہوئے کہا کہ اسلام آباد پولیس بہتر طریقے سے کردار ادا کر رہی ہے،پولیس کا کام بہت مشکل ہے،معاشی صورتحال کی وجہ سے جرائم میں اضافہ ہو رہا ہے،اس سے ان کا کام اور مشکل ہو جاتا ہے، جرائم کو روکنا بھی انہی لوگوں کی ذمہ داری ہے۔ انہوں نے کہا کہ 74سال ہو گئے ہیں وفاق کی اپنی فرانزک لیبارٹری نہیں ہے، کوئی کیس ہو جاتا ہے تو لاہور بھیجنا پڑتا ہے، وہ ہمارا سارا کیس خراب کر دیتے ہیں،دسمبر سے پہلے پہلے اس پر کام شروع ہو جائے گا۔
انہوں نے کہا کہ شہداءکے لواحقین کو سلام پیش کرتا ہوں،میری کوشش ہے کہ شہداءکے لواحقین کی فائلیں ایک ماہ کے اندر اندر کلیئر ہو جائیں۔ انہوں نے کہاکہ ہم چاہتے ہیں کہ پولیس میں نوجوانوں کو بھرتی کیا جائے،دو قسطوں میں ایک ہزار ہزار کر کے دو ہزار نوجوان میرٹ پر بھرتی کئے جائیں گے، اسلام آباد پولیس کو مثالی پولیس بنائیں گے، میری خواہش ہے کہ یہ بھرتی پورے پاکستان سے ہوں،
وفاق پر سارے صوبوں کا حق ہے، آئی جی اور دیگر پولیس افسران کو مبارکباد پیش کرتا ہوں، میں پولیس کی سیاست کرنے والا سیاستدان نہیں ہوں،پچاس سال ہو گئے ہیں مجھے یہ نہیں پتہ ہوتا کہ راولپنڈی کا سی سی پی او اور آر پی او کون ہے،میں سمجھتا ہوں کہ حکومت کواپنا اور اداروں کو اپنا کام کرنا چاہیے۔
