اسلام آباد(رپورٹنگ آن لائن) حکومت مخالف اپوزیشن اتحاد پاکستان ڈیموکریٹک موومنٹ (پی ڈی ایم) دو حصوں میں تقسیم ہوگئی اور سینیٹ اجلاس سے قبل اپوزیشن کے علیحدہ علیحدہ اجلاس ہوئے۔
آزاد اپوزیشن کا اجلاس پارلیمنٹ ہاوس میں مسلم لیگ ن کے سینیٹر اعظم نذیر تارڑ کی صدارت میں ہوا جس میں ن لیگ کے علاوہ جے یو آئی، پی کے میپ، نیشنل پارٹی اور بی این پی مینگل کے سینیٹرز بھی شریک ہوئے۔
سینیٹ میں آزاد اپوزیشن کے اجلاس میں سابق وزیراعظم شاہد خاقان عباسی نے بھی شرکت کی جبکہ مشاہد حسین سید، مولانا عبدالغفورحیدری، طاہر بزنجو بھی اجلاس میں شریک ہوئے۔ اس کے علاوہ مصدق ملک، کامران مرتضی، مولاناعطاالرحمان سمیت دیگر بھی اجلاس میں شریک ہوئے۔
دوسری جانب پارلیمنٹ ہاوس کے اپوزیشن چیمبر میں یوسف رضا گیلانی کی زیر صدارت بھی اجلاس منعقد ہوا، اجلاس میں پیپلز پارٹی کی حمایتی جماعتوں کے سینیٹرز نے شرکت کی۔
