لاہور (ر پورٹنگ آن لائن) تحریک انصاف کے مرکزی رہنما جمشید اقبال چیمہ نے کہا ہے کہ پیپلزپارٹی اور (ن) لیگ والے دھمکیوں کے ذریعے حکومت اور احتساب کے اداروں کو دبائو میں لانے کی ناکام کوشش کر رہے ہیں ،احتجاج کی دھمکیاں دینے والی پیپلز پارٹی اپنی مقبولیت کے حوالے سے کسی غلط فہمی کا شکار ہے ،جو سابق حکمران ملک کو اس نہج پر پہنچانے کے ذمہ دار ہیں آج وہ دکھاوے کیلئے تشویش کا اظہار کر رہے ہیں جو مضحکہ خیز ہے ۔ ان خیالات کا اظہار انہوںنے حلقہ این اے 133کے مرکزی دفتر میں پارٹی رہنمائوں اور حلقے کے اکابرین سے گفتگو کرتے ہوئے کیا۔
جمشید اقبال چیمہ نے کہا کہ پیپلز پارٹی اور (ن) لیگ کی خواہش ہے کہ ان کی متعارف کرائی گئی”کچھ لو اور کچھ دو ”کی پالیسی کے تحت انہیںکرپشن کاپیسہ ہضم کرنے کی اجازت دیدی جائے گی تو یہ ان کی بھول ہے ۔ وزیر اعظم عمران خان کا عزم ہے کہ نہ صرف ملک کی لوٹی ہوئی دولت واپس لیں گے بلکہ کرپشن کے بیج کو نا پیدکر دیا جائے گا ۔ انہوں نے کہا کہ بلاول بھٹو اور پی ڈی ایم والے سن لیں حکومت یا احتساب کے ادارے ان کی احتجاج کی دھمکیوں سے ہرگز مرعوب نہیں ہوں گے۔ پیپلزپارٹی کااپنی مقبولیت کے زعم میں مبتلا ہونا اس کی بہت بڑی غلط فہمی ہے ۔ آئندہ عام انتخابات میں ان کا سندھ سے بوریا بستر گول ہو جائے گا ۔
