لاہور (رپورٹنگ آن لائن) پاکستان کرکٹ بورڈ کے چیئرمین محسن نقوی نے پی ایس ایل 10کے شاندار اختتام پر لیگ انتظامیہ سمیت قانون نافذ کرنے والے اداروں اور عوام کا شکریہ ادا کیا ہے۔
محسن نقوی نے کہا کہ پی ایس ایل 10کے کامیاب اختتام پر سب سے پہلے اللہ تعالی کے حضور سربسجود ہیں، پی سی بی و پی ایس ایل ٹیم کا دن رات محنت پر دل کی گہرائیوں سے شکریہ ادا کرتا ہوں۔انہوں نے کہا کہ یہ پاک آرمی، رینجرز، پولیس اور انتظامیہ کی انتھک محنت کا نتیجہ ہے، پاک آرمی، ایئر فورس اور نیوی کی جرات اور بہادری کو یادگار خراج تحسین پیش کیا گیا، تینوں فورسز کی طرف سے بھرپور حوصلہ افزائی پر خصوصی شکریہ ادا کرتا ہوں۔
چیئرمین پی سی بی کا کہنا تھا کہ سٹیڈیم آکر میچ دیکھنے پر فیلڈ مارشل جنرل عاصم منیر، ایئر چیف ظہیر احمد بابر اور نیول چیف ایڈمرل نوید اشرف کا خصوصی شکریہ ادا کرتا ہوں۔محسن نقوی نے مزید کہا کہ راولپنڈی کرکٹ سٹیڈیم کے قریب دشمن کے حملے کے بعد پی ایس ایل کا دوبارہ آغاز بہت بڑا چیلنج تھا.
پی ایس ایل 10کا کامیابی سے انعقاد پرامن پاکستان کی جیت ہے، شائقین کرکٹ کے نظم و ضبط اور جوش و خروش کا کوئی جوڑ نہ تھا۔واضح رہے کہ پی ایس ایل 10کا فائنل اتوار کے روز قذافی سٹیڈیم میں کھیلا گیا تھا جس میں لاہور قلندرز نے کوئٹہ گلیڈی ایٹرز کو 6وکٹوں سے شکست دے کر تیسری بار ٹائٹل اپنے نام کیا۔
