اسلام آباد (رپورٹنگ آن لائن) پاکستان پیپلز پارٹی نے وزیراعظم کے دورہ سعودی عرب سے متعلق پارلیمان کو اعتماد میں لینے کا مطالبہ کردیا ہے اس حوالے سے گفتگو کرتے ہوئے پیپلز پارٹی کے سیکرٹری جنرل سید نیئر حسین بخاری نے کہا ہے کہ وزیراعظم کے دورے سے متعلق مختلف خبریں سامنے آ رہی ہیں،حکومت تمام تفصیلات پارلیمان کے سامنے رکھے،
نیر بخاری نے کہا کہ بتایا جائے کہ دورے میں کشمیر کے معاملے پر بات چیت ہوئی اگر ہوئی تو کیا طے پایا ہے ،پاکستان کے بھارت کے ساتھ بیک ڈور رابطوں کی خبریں بھی سامنے آ رہی ہیں کیا یہ حقیقت ہے بھارت کے ساتھ بیک ڈور رابطے ہیں اگر ہیں تو حقائق سے پارلیمان کو اعتماد میں لیں،انہوں نے کہا کہ موجودہ حکومت کی ناقص خارجہ پالیسی کے باعث کئی سوالات اٹھ رہے ہیں حکومت نے پارلیمان کو مفلوج بنا کر رکھ دیا ہے پیپلزپارٹی اہم معاملات میں پارلیمان کو بائے پاس کرنے کی اجازت کسی صورت نہیں دے گی
