لاہور( رپورٹنگ آن لائن)پاکستان پیٹرولیم ڈیلرز ایسوسی ایشن نے مارجن میں اضافہ نہ کئے جانے پر 25نومبر سے ملک گیر ہڑتال کا اعلان کرتے ہوئے کہا ہے کہ ہڑتال کے دوران صرف ایمبولنسز کو پیٹرول فراہم کیا جائے گا۔ایسوسی ایشن کے ترجمان نے کہا ہے کہ کم منافع کے مارجن پر پٹرول فروخت کرنے پر ہڑتال کی کال دی ہے کیونکہ ہمارے پاس ہڑتال کے علاوہ کوئی راستہ نہیں ،حکومت ہمارے مطالبات کی 17 نومبر کی ڈیڈ لائن کو پورا کرنے میں ناکام رہی ہے۔
اس سے قبل چیئرمین پیٹرولیم ڈیلرز ایسوسی ایس عبدالسمیع خان نے مارجن نہ بڑھانے کی صورت میں 5 نومبر کو ملک میں پیٹرول پمپس بند رکھنے کا اعلان کیا تھا۔عبدالسمیع خان کے مطابق حکومت نے ڈیلرز کے کمیشن میں اضافے کی یقین دہانی کرائی تھی لیکن اس پر عمل نہیں ہوا۔
بعد ازاں وفاقی وزیر حماداظہر سے چیئرمین پاکستان پیٹرولیم ڈیلر ایسوسی ایشن نے وفد کے ہمراہ ملاقات کی جس میں حکومت نے پیٹرولیم ڈیلرز کو مارجن بڑھانے کی یقین دہانی کرادی تھی جس کے بعد پیٹرولیم ڈیلرز ایسوسی ایشن کی جانب سے ہڑتا 17 نومبر تک موخر کردی گئی تھی۔
