پیر محل (رپورٹنگ آن لائن) ٹوبہ ٹیک سنگھ کی تحصیل پیرمحل میں افسوسناک واقعہ پیش آیا، جہاں گھر میں گیس لیک ہونے کے باعث آتشزدگی سے سات افراد زندگی کی بازی ہار گئے جبکہ 3 زخمی ہوگئے۔
مرنے والوں میں 5 خواتین اور 2 بچے بھی شامل ہیں۔وزیر اعلی پنجاب عثمان بزدار نے ٹوبہ ٹیک سنگھ میں گھر میں آتشزدگی سے قیمتی انسانی جانوں کے ضیاع پر افسوس کا اظہار کیا اور واقعہ میں جاں بحق افراد کے لواحقین سے دلی ہمدردی و اظہار تعزیت کیا۔
انہوں نے کہا کہ آتشزدگی سے قیمتی انسانی جانوں کے ضیاع پر دلی صدمہ ہوا، جاں بحق افراد کے لواحقین کے غم میں برابر کے شریک ہیں۔ وزیراعلی عثمان بزدار نے واقعہ کے بارے میں انتظامیہ سے رپورٹ طلب کرتے ہوئے تحقیقات کا حکم دے دیا۔
