ممبئی(رپورٹنگ آن لائن) معروف اداکارہ اور دی گریٹ انڈین کپل شو کی جج ارچنا پورن سنگھ نے انکشاف کیاہے کہ پہلے کام کامعاوضہ 100روپے کا ملنے کی وجہ سے خوشی سے سڑکوں پر ناچ رہی تھی۔
تفصیلات کے مطابق معروف اداکارہ اور دی گریٹ انڈین کپل شو کی جج ارچنا پورن سنگھ نے اپنی ابتدائی جدوجہد کی کہانی مداحوں کے ساتھ شیئر کی ہے۔ اپنے حالیہ وی لاگ میں انہوں نے بتایا کہ وہ دہرادون سے ایک سوٹ کیس اور جعلی خط کے ساتھ ممبئی آئی تھیں تاکہ شہر میں رہائش حاصل کر سکیں۔
ارچنا نے بتایاکہ میں نے اپنے دوست سے ایک جعلی خط لیا تھا اور اسی کے ذریعے رہنے کی جگہ ڈھونڈی،صبح کا ناشتہ کرتے ہی مجھے وہاں سے نکلنا پڑتا تھا کیونکہ لوگ سمجھتے تھے کہ میں کہیں کام پر جاتی ہوں لیکن درحقیقت میں آڈیشنز دینے کیلئے نکلتی تھی۔انہوں نے بتایا کہ ان کا پہلا کام ایک اشتہار میں بطور جونیئر آرٹسٹ تھا جہاں وہ اوم پوری کے ساتھ تھیں اس کام کیلئے انہیں صرف 100روپے ملے لیکن اس چھوٹے سے معاوضے نے انہیں بیحد خوشی دی۔
ارچنا نے کہاکہ میں نے 100روپے کا چیک لیا اور خوشی سے تارڈیو کی سڑکوں پر ناچ رہی تھی۔کچھ سال بعد، انہیں ایک فلم میں اوم پوری کے ساتھ بطور ہیروئن کام کرنے کا موقع ملا، لیکن بدقسمتی سے وہ فلم ریلیز نہیں ہو سکی۔دی گریٹ انڈین کپل شو پر 2019سے اپنی موجودگی کے بارے میں بات کرتے ہوئے ارچنا نے کہا کہ انہوں نے نوجوت سنگھ سدھو کی جگہ جج کا کردار سنبھالا اور تب سے وہ اپنی مزاحیہ باتوں اور دلچسپ انداز سے مداحوں کے دل جیت رہی ہیں۔
