اسلام آباد (رپورٹنگ آن لائن)نائب صدر پیپلز پارٹی سینیٹر شیری رحمان نے کہاہے کہ پہلی بار یوٹیلٹی اسٹور کی سبسڈی غریب کو نہیں ، مافیا کو جا رہی ہے، حکومت نے مہنگائی اور کرپشن کے نئے ریکارڈ قائم کئے ہیں، اب غریب یوٹیلٹی اسٹور سے بھی خریداری نہیں کر سکے گا۔ اپنے بیان میں انہوںنے کہاکہ حکومت نے گندم، چینی اور آئل کی قیمتوں میں مجموعی طور پر 53 فیصد اضافہ کیا ہے، مجموعی ہفتہ وار مہنگائی کی شرح پہلے ہی 12.75 فیصد تھی۔ انہوںنے کہاکہ عید سے پہلے ریلیف کے بجائے عوام پر مہنگائی کا بم گرایا گیا، غریب کو مہنگائی، اشرافیہ کو ریلیف سے نوازا جا رہا ہے،اب غریب یوٹیلٹی اسٹور سے بھی خریداری نہیں کر سکے گا، مافیا نے چینی بحران سے 230 ارب روپے بنائے لیکن قیمتوں کا بوجھ غریب کی جیب پر پڑے رہا۔
شیری رحمان نے کہاکہ پہلی بار یوٹلٹی اسٹور کی سبسڈی غریب کو نہیں بلکہ مافیا کو جا رہی ہے، یوٹیلٹی اسٹور کے 40 ہزار ٹن چینی 90 روپے فی کلو کے حساب سے خریدی۔ انہوںنے کہاکہ اب یوٹیلٹی اسٹور پر چینی 68 کے بجائے 85 روپے کلو دستیاب ہوگی، یوٹیلٹی اسٹور پر 170 روپے فی کلو ملنے والا گھی اب 260 روپے میں دستیاب ہوگا۔انہوںنے کہاکہ 20 کلو آٹے کا تھیلا 800 روپے سے بڑھا کر 950 روپے کر دیا گیا ہے، کیا یہ ہے ریلیف؟ ۔انہوںنے کہاکہ اس حکومت نے مہنگائی اور کرپشن کے نئے ریکارڈ قائم کئے ہیں۔
