لاہور(رپورٹنگ آن لائن ) اپوزیشن لیڈر پنجاب حمزہ شہباز شریف نے کہا ہے کہ پٹرول کی قیمت میں ہوشربا اضافہ عوام کا معاشی قتل ہے۔پیٹرول کی قیمت میں 12 روپے سے زائد اضافے پر ردعمل میں حمزہ شہباز شریف نے کہا کہ پاکستان کی تاریخ میں پٹرول کی قیمت 159 روپے سے زائد کرنے کا سہرا موجودہ حکومت کے سر ہے۔
ہر پندرہ دن بعد عوام کی جیب پر ڈاکا مارا جاتا ہے۔ اپنے بیان میں ان کا کہنا تھا کہ سند یافتہ کرپٹ ترین حکومت نے ملک کو دا پر لگا دیا ہے۔ آخر کس ایجنڈے کے تحت عوام کو زندہ درگور کیا جا رہا ہے۔ انہوں نے کہا کہ ملکی معیشت غیر ملکی اداروں کو گروی رکھنے کے بعد یہ حکومت عوام کو کند چھری تلے رکھنا چاہتی ہے۔ اس حکومت نے پاکستان کے متوسط اور غریب طبقے کی کمر توڑ دی ہے۔
