شہباز اکمل جندران۔۔۔
پنجاب کریکولم اینڈ ٹیکسٹ بک بورڈ لاہور کے پروڈکشن ڈائریکٹوریٹ نے کار،موٹرسائیکل، ایل ای ڈی اور دیگرقیمتی انعامات کی قرعہ اندازی کا جھانسہ دیکر عوام بیوقوف بنانے کی کوشش ہی نہیں کی بلکہ عوام کی جیبوں پر ڈاکا بھی ڈالا ہے۔
ذرائع کے مطابق پی سی ٹی بی نے جعلی درسی کتب کی روک تھام کے لئے مختلف اخبارات میں 5 لاکھ 24 ہزار روپے کے اشتہارات دیئے اور عوام راغب کیا کہ وہ درسی کتب کی خریداری کے وقت سکیورٹی فیچرز کی موجودگی کو یقینی بناتے ہوئے 8070 پر ایس ایم ایس کریں۔اور ایس ایم ایس کے جواب میں موصول ہونے والے سکیورٹی کوڈ کی جانچ کرتے ہوئے کتاب کے صحیح یا غلط Pirated ہونے کے متعلق معلومات حاصل کریں اور pirated کتابوں کی بذریعہ کال یا واٹس ایپ میسیج پی سی ٹی بی کو آگاہ کریں۔اور بذریعہ قرعہ اندازی جیتیں نئی کار، موٹر سائیکل، ایل ای ڈی اور دیگر بہت سے بیش قیمت انعامات۔
قومی اخبارات میں اشتہارات شائع ہونے کے بعد انعامی سکیم کے تحت بورڈ کو 8070 پر 13 ہزار224ایس ایم ایس موصول ہوئے تاہم پی سی ٹی بی نے کسی قسم کی قرعہ اندازی کی نہ ہی عوام کو قرعہ اندازی یا انعامی سکیم کی تنسیخ کے متعلق آگاہ کیا۔
یوں پی سی ٹی بی کے افسر وں نے ایک طرف قومی خزانے سے لاکھوں روپے اخبار ات میں اشتہارات کی صورت اڑا دیئے تو دوسری طرف ایس ایم ایس کی صورت عوام کی جیبیں بھی خالی کیں۔
اس سلسلے میں پی سی ٹی بی کے سابق ڈائیریکٹر پروڈکشن افضال احمد نے تحریری طور پر سکیم کے جواب میں 13 ہزار 224 ایس ایم ایس کی وصولی اور 5 لاکھ 24 ہزار 383 روپے بطور بل اخبار اشتہارات ادا کرنے کو تسلیم کیا تاہم موجودہ قائمقام ڈائریکٹر پروڈکشن محمد اختر بٹ کا کہ کہنا ہے ایس ایم ایس بہت کم موصول ہوئے تھے جس کی وجہ سے قرعہ اندازی نہیں کی گئی۔
