پنجاب میں “مردہ اور پردیسی” گاڑیوں کے متعلق بڑا حکم نامہ

شہباز اکمل جندران۔۔۔

پنجاب حکومت نے صوبے میں ایسی تمام گاڑیوں کی رجسٹریشن منسوخ کرتے ہوئے ڈی رجسٹرڈ کرنے کاحکم جاری کر دیا ہے جو حادثوں یا کسی بھی وجہ سے تباہ ہو چکی ہیں۔یا بیکار ہوچکی ہیں۔یا مستقل طورپر پنجاب سے باہر جاچکی ہیں۔

اس سلسلے میں محکمہ ٹرانسپورٹ پنجاب کی طرف سے صوبائی سیکرٹری ایکسائز ٹیکسیشن اینڈ نارکوٹکس کنٹرول ڈیپارٹمنٹ پنجاب کو خط لکھا گیا ہے۔جس میں موٹر وہیکلز آرڈیننس 1965کے سیکشن 35 کا حوالے دیتے ہوئے کہا گیا ہے کہ پنجاب میں ایسی تمام گاڑیاں جو حادثوں یا کسی بھی وجہ سے تباہ ہو چکی ہیں۔

یا بیکار ہوچکی ہیں۔یا مستقل طورپر پنجاب سے باہر جاچکی ہیں انہیں ڈی رجسٹرڈ کیا جائے کیونکہ ایسی گاڑیوں کی وجہ سے بہت سے مسائل پیدا ہوتے ہیں۔

ٹرانسپورٹ ڈیپارٹمنٹ پنجاب کی طرف سے لیٹر موصول ہونے کے بعد صوبائی سیکرٹری ایکسائز ٹیکسیشن اینڈ نارکوٹکس کنٹرول ڈیپارٹمنٹ پنجاب نے ڈی جی ایکسائز کو موٹر وہیکلز آرڈیننس 1965 کے سیکشن 35 پر عمل درآمد کرنے کے احکامات جاری کر دیئے ہیں۔