لاہور (رپورٹنگ آن لائن) سینئر وزیر پنجاب مریم اورنگزیب نے پنجاب میں عوام کو بجلی بلوں میں ریلیف کی تفصیلات جاری کردیں ۔ انہوںنے تفصیلات جاری کرتے ہوئے کہا کہ 201سے 500یونٹ تک بجلی صارفین کو بلوں میں14روپے فی یونٹ کمی کا ریلیف پہنچنا شروع ہوگیاہے، الحمدللہ ، لاہور،ملتان، فیصل آباد، گوجرانوالہ اور اسلام آباد کی پانچ بجلی کمپنیوں کے 35لاکھ 16ہزار 877 صارفین کو ریلیف دیاگیا ۔
انہوں نے کہا کہ پانچوں کمپنیوں کی جانب سے ریلیف والے بلوں کی پرنٹنگ اور ترسیل کا عمل تیزی سے جاری ہے ، لاہور الیکڑک سپلائی کارپوریشن کے 8لاکھ 40ہزار صارفین کو ریلیف دیا گیا ،ملتان الیکڑک سپلائی کارپوریشن کے 6لاکھ 53 ہزار 883صارفین کو ریلیف ملا ، فیصل آباد الیکڑک سپلائی کارپوریشن کے 5لاکھ 6ہزار 139صارفین کو ریلیف ملا ، گوجرانوالہ الیکڑک سپلائی کارپوریشن کے 7لاکھ 31 ہزار 305 صارفین کو ریلیف ملا اور اسلام آباد الیکڑک سپلائی کارپوریشن کے 7لاکھ 85ہزار 550صارفین کو ریلیف ملا ۔
بجلی بلوں میں خصوصی ریلیف کی رقم بھی شائع کر دی گئی ہے ۔ انہوں نے کہا کہ شمسی توانائی کے ذریعے عوام کو مستقل ریلیف دینے کا اگلا مرحلہ جلد شروع کریں گے، اِن شااللہ ، صفر سے 200یونٹ استعمال کرنے والے بجلی صارفین کو مفت سولر سسٹم فراہم کریں گے ، 201سے 500یونٹ استعمال کرنے والے صارفین کو بلاسود سولر سسٹم آسان اقساط پر ملے گا ۔
مریم اورنگزیب نے کہا کہ وزیراعظم شہباز شریف نے ایک سے 200یونٹ استعمال کرنے والے بجلی صارفین کو 50ارب روپے کا ریلیف دیا ، وزیراعلی پنجاب مریم نوازشریف نے مشکل معاشی حالات میں بھی عوام کو ریلیف دینے کا ناممکن کام ممکن کردکھایا ہے ، وزیراعلی مریم نوازشریف نے عوام کا ساتھ دے کر ثابت کیا کہ دل میں احساس ہو تو عمل میں اس کی جھلک ضرور نظر آتی ہے ، عوام کو مزید ریلیف دیں گے، ہر ناممکن کو ممکن کر دکھانا، ہمیشہ وعدہ نبھانا ہی نوازشریف کی روایت ہے ۔
مریم اورنگزیب نے کہا کہ نواز شریف کے دور کی سستی روٹی، بجلی کو عمران خان نے مہنگا کیا، ہم پھر اسے واپس سستا کر رہے ہیں ، مہنگائی پر قوم کا مجرم عمران خان ہے جو مہنگائی واپس لایا ، نواز شریف نے آئی ایم کو خدا حافظ کہا، آئی ایم ایف کی پاکستان کو دوبارہ ضرورت عمران خان کی معاشی تباہی کی وجہ سے پڑی۔وزیراعلی مریم نوازشریف عوام کو ریلیف دینے کی خدمت کی ایک نئی تاریخ بنا رہی ہیں ، عوام کو مہنگائی سے نجات دلانا، بہترین خدمت کا نظام لانا اور صوبے کو دنیا میں ترقی کی مثال بنانا،مریم نوازشریف کا مشن ہے ۔
انہوں نے بتایا کہ پاکستان مسلم لیگ (ن) کے صدر محمد نوازشریف نے وزیراعلی مریم نوازشریف کے ہمراہ 16اگست کو پنجاب کے عوام کے لئے بجلی بلوں میں 14 روپے فی یونٹ کمی کا اعلان کیاتھا، پنجاب کے عوام کو ریلیف کی فراہمی کے لئے 46ارب روپے کی رقم مختص کی گئی ہے۔
