لاہور (رپورٹنگ آن لائن) وزیر اطلاعات و ثقافت پنجاب عظمیٰ بخاری نے کہا ہے کہ وزیراعلی پنجاب مریم نواز کی ہدایات پر تمام ادارے سیلابی صورتحال سے نمٹنے کے لیے پہلے دن سے متحرک ہیں،سیالکوٹ میں گیارہ سالہ بارش کا ریکارڈ ٹوٹنے اور راوی میں 38سال بعد آنے والی غیر معمولی صورتحال کے باوجود متاثرہ شہریوں کو بروقت ریسکیو کیا گیا اور کسی قسم کے جانی نقصان کا سامنا نہیں کرنا پڑا۔
ان خیالات کا اظہار وزیر اطلاعات و ثقافت پنجاب عظمی بخاری، وزیر مواصلات صہیب احمد بھرت اور وزیر بلدیات ذیشان رفیق نے ڈی جی پی آر میں مشترکہ پریس کانفرنس سے خطاب کرتے ہوئے کیا۔ عظمیٰ بخاری نے بتایا کہ وزیراعلی پنجاب جاپان سے واپسی پر جہاز میں بھی سیلابی صورتحال پر اعلی سطح اجلاس منعقد کر چکی ہیں اور آج بھی مسلسل میٹنگز کے ذریعے براہ راست صورتحال کی نگرانی کر رہی ہیں۔ انہوں نے کہا کہ پنجاب حکومت ہمیشہ ہر ہنگامی صورتحال سے پہلے منصوبہ بندی کرتی ہے اور یہی وجہ ہے کہ مشکل حالات میں عوام کو تنہا نہیں چھوڑا گیا۔
انہوں نے مزید کہا کہ وزیراعلی مریم نواز دن رات سولہ سولہ گھنٹے کام کرتی ہیں، نہ تنخواہ لیتی ہیں، نہ چھٹی کرتی ہیں اور سرکاری دوروں کے اخراجات بھی اپنی جیب سے برداشت کرتی ہیں۔ جاپان کے حالیہ سرکاری دورے کے حوالے سے بات کرتے ہوئے عظمی بخاری نے کہا کہ وزیراعلی پنجاب جاپان حکومت کی دعوت پر گئیں جہاں مختلف کمپنیوں کو پاکستان میں سرمایہ کاری پر راضی کیا گیا اور زراعت سمیت دیگر محکموں کے ساتھ ایم او یوز پر دستخط کیے گئے۔ ان کا کہنا تھا کہ یہ دورہ پنجاب اور پاکستان دونوں کے لیے بے حد اہم تھا لیکن کچھ عناصر بلاوجہ تنقید کر رہے ہیں۔
تنقید برائے اصلاح کا خیر مقدم ہے مگر کپڑوں اور جوتوں پر اعتراضات سطحی اور غیر سنجیدہ رویے کی عکاسی کرتے ہیں۔ وزیر اطلاعات نے واضح کیا کہ آٹے کی قیمت میں اضافہ روکنے کے لیے وزیراعلی نے سخت ہدایات جاری کر رکھی ہیں، ادویات کی پنجاب بھر میں کوئی قلت نہیں اور یہ تاثر بالکل غلط ہے کہ گوداموں میں دوائیاں موجود ہوں اور عوام کو دستیاب نہ ہوں۔ اس موقع پر صوبائی وزیر مواصلات صہیب احمد بھرت اور صوبائی وزیر بلدیات ذیشان رفیق نے بھی پریس کانفرنس سے خطاب کیا۔ صہیب احمد بھرت نے کہا کہ جاپان کا دورہ مکمل تیاری اور منصوبہ بندی کے ساتھ کیا گیا۔
جاپانی اداروں کے ساتھ مختلف شعبوں میں تعاون کے امکانات پر بات ہوئی اور انسٹیٹیوٹ آف میڈیسن کا خصوصی دورہ بھی کیا گیا۔ صوبائی وزیر بلدیات ذیشان رفیق نے کہا کہ جاپان میں وزیراعلی پنجاب کے ”ستھرا پنجاب پروگرام”کو بے حد سراہا گیا۔ یہ پروگرام 13کروڑ شہریوں کے لیے صفائی کا دنیا کا سب سے بڑا یکساں نظام ہے۔ انہوں نے کہا کہ پنجاب میں روزانہ 50ہزار ٹن ویسٹ جمع ہوتا ہے جسے ری سائیکل کیا جائے گا۔
وفد نے یوکوہاما میں ویسٹ سے 9 میگاواٹ بجلی بنانے والے پلانٹ اور واٹر فلٹریشن و ویسٹ واٹر ٹریٹمنٹ پلانٹس کا بھی جائزہ لیا۔ ذیشان رفیق کے مطابق یہ جدید ٹیکنالوجی پنجاب میں متعارف کرائی جائے گی تاکہ ڈمپنگ سائٹس سے توانائی اور پانی کی افادیت حاصل ہو سکے۔وزرا نے کہا کہ سیلابی صورتحال کا مستقل حل صرف ڈیموں کی تعمیر ہے، اسی لیے حکومت پنجاب پانی کے ذخائر پر خصوصی توجہ دے رہی ہے۔ اس موقع پر انہوں نے بھارت کی بڑھتی ہوئی دہشت گردانہ کارروائیوں کی بھی مذمت کی۔
