لاہور (رپورٹنگ آن لائن) بورڈ آف انٹرمیڈیٹ اینڈ سیکنڈری ایجوکیشن پنجاب نے سال 2026ء کے انٹرمیڈیٹ سالانہ امتحانات کی تاریخوں کا باضابطہ اعلان کر دیا ۔
جاری کردہ شیڈول کے مطابق انٹرمیڈیٹ پارٹ دوم (کلاس 12)کے امتحانات 5مئی 2026ء سے شروع ہوں گے جبکہ انٹرمیڈیٹ پارٹ اول (کلاس 11) کے امتحانات کا آغاز 24مئی 2026ء سے ہوگا۔ بی آئی ایس ای کے ایک عہدیدار کے مطابق امتحانی تاریخیں صوبائی تعلیمی کیلنڈر کو مدنظر رکھتے ہوئے حتمی شکل دی گئی ہیں تاکہ امتحانات کا انعقاد منظم انداز میں ہو اور نتائج بروقت جاری کیے جا سکیں۔
چونکہ پنجاب کے تمام تعلیمی بورڈز ایک مشترکہ امتحانی کیلنڈر پر عمل کرتے ہیں، اس لیے بی آئی ایس ای فیصل آباد کی جانب سے اعلان کردہ یہ تاریخیں لاہور، راولپنڈی، ملتان، گوجرانوالہ سمیت صوبے بھر کے تمام بورڈز میں نافذ ہوں گی۔ پنجاب کے تعلیمی بورڈز عموماً میٹرک (کلاس 9اور 10) کے امتحانی شیڈول کو حتمی شکل دینے کے بعد انٹرمیڈیٹ امتحانات کی تاریخوں کا اعلان کرتے ہیں تاکہ انتظامی اور لاجسٹک امور بہتر انداز میں انجام دیئے جا سکیں،
رول نمبر سلپس، تفصیلی ڈیٹ شیٹس اور امتحانی مراکز کی معلومات امتحانات کے قریب جاری کی جائیں گی۔ طلبہ کو ہدایت کی گئی ہے کہ وہ اپنی تیاری جاری رکھیں اور تازہ ترین معلومات کے لیے اپنے متعلقہ تعلیمی بورڈز سے رابطے میں رہیں۔
