لاہور(رپورٹنگ آن لائن )پولیس نے گزشتہ تین برسوں کے دوران پتنگ بازی کے خلاف کی گئی کارروائیوں کی تفصیلی رپورٹ لاہور ہائیکورٹ میں جمع کرا دی۔
رپورٹ بسنت کے خلاف زیر سماعت کیس میں سی سی پی او لاہور کی جانب سے عدالت میں پیش کی گئی۔رپورٹ کے مطابق سال 2024ء سے 2026ء تک پتنگ بازی کے خلاف مجموعی طور پر 5ہزار 915مقدمات درج کیے گئے، سب سے زیادہ کارروائیاں سال 2024میں ہوئیں، جب 3ہزار 534ایف آئی آرز درج کی گئیں، سال 2025ء میں پتنگ بازی کے خلاف 1ہزار 918مقدمات درج ہوئے، اس دوران ایک شہری جاں بحق ہوا۔پولیس رپورٹ میں بتایا گیا کہ تین برسوں کے دوران پتنگ بازی میں ملوث 5ہزار 270افراد کو گرفتار کیا گیا، سال 2024ء میں پتنگ بازی کے واقعات میں 10افراد زخمی ہوئے، 2025ء میں 2افراد زخمی ہوئے جبکہ 2026ء میں تاحال کوئی جانی نقصان رپورٹ نہیں ہوا۔
رپورٹ کے مطابق پولیس نے تین سالوں میں 90ہزار سے زائد پتنگیں برآمد کیں، خطرناک اور مہلک ڈور کے خلاف کریک ڈائون کے دوران 5ہزار سے زائد کیمیکل اور دھاتی ڈوریں ضبط کی گئیں۔پولیس نے رپورٹ میں اس بات پر زور دیا کہ پتنگ بازی سے متعلق بنائے گئے قانون پر سختی سے عمل درآمد کروایا جائے گا اور کسی بھی غیر قانونی اقدام کے خلاف فوری اور مثر کارروائی عمل میں لائی جائے گی۔واضح رہے کہ ایڈووکیٹ اظہر صدیق سمیت دیگر درخواست گزاروں نے پتنگ بازی کی اجازت دینے کے خلاف لاہور ہائیکورٹ سے رجوع کر رکھا ہے۔
