راولپنڈی(رپورٹنگ آن لائن)فیلڈ مارشل سید عاصم منیر ، چیئرمین جوائنٹ چیفس آف اسٹاف کمیٹی، چیف آف نیول اسٹاف، چیف آف ایئر اسٹاف اور مسلح افواج پاکستان کی جانب سے حوالدار لالک جان شہید نشان حیدر کو کارگل جنگ کے دوران مادر وطن کے دفاع میں بے مثال جرات، غیر متزلزل عزم اور عظیم قربانی پر دل کی گہرائیوں سے خراج عقیدت پیش کیا گیا۔
آئی ایس پی آر کی کے مطابق لالک جان شہید نے 1999میں دشمن کے تابڑ توڑ حملے بہادری سے پسپا کیے،شدید زخمی ہونے کے باوجود میدان جنگ سے نکلنے سے انکار کیا اور آخری دم تک دشمن کا مقابلہ کرتے ہوئے جام شہادت نوش کیا۔مسلح افواج اور پوری قوم ان کی قربانی کو عظیم احترام اور شکر گزاری کے ساتھ یاد کرتی ہے.
شہید کی قربانی ہمارے لیے مشعلِ راہ ہے اور موجودہ و آئندہ نسلوں کے لیے حوصلہ اور عزم کا استعارہ ہے۔آئی ایس پی آر کے مطابق مسلح افواج اس عہد کی تجدید کرتی ہیں کہ شہدا پاکستان کے مقدس مشن مادر وطن کے دفاع کو جرات، فرض شناسی اور عزت و وقار کے ساتھ جاری رکھیں گے۔
