اسلام آ باد (رپورٹنگ آن لائن ) چیف آف دی نیول اسٹاف ایڈمِرل محمد امجد خان نیازی نے کہا ہے کہ پاک بحریہ دشمن کی جارحیت کا منہ توڑ جواب دینے کے لیے ہمہ وقت تیار ہے۔
ترجمان پاک بحریہ کے مطابق پاک بحریہ کی سالانہ فلیٹ ایفیشنسی پریڈ برائے سال 2021 کا کراچی میں انعقاد ہوا ، چیف آف دی نیول اسٹاف ایڈمِرل محمد امجد خان نیازی تقریب کے مہمانِ خصوصی تھے۔ ترجمان پاک بحریہ کا کہنا ہے کہ نیول چیف نے پاکستان نیوی فلیٹ کی آپریشنل تیاریوں پر اطمینان کا اظہار کیا۔
چیف آف دی نیول اسٹاف ایڈمِرل محمد امجد خان نیازی نے تقریب سے خطاب کرتے ہوئے کہا کہ پاک بحریہ خطے میں سمندری تحفظ ، گوادر پورٹ اور سی پیک کی سیکورٹی میں انتہائی اہم کردار ادا کر رہی ہے۔ انہوں نے کہا کہ پاک بحریہ دشمن کی کسی بھی جارحیت کا منہ توڑ جواب دینے کے لیے ہمہ وقت تیار ہے۔
ترجمان پاک بحریہ کا کہنا ہے کہ نیول چیف نے فرائض کی انجام دہی میں فلیٹ یونٹس اور افسران کے جذبے کو سراہا ، مہمانِ خصوصی نے بہترین کارکردگی کا مظاہرہ کرنے والے یونٹس کو اعزازی شیلڈز سے بھی نوازا۔
