لاہور ( رپورٹنگ آن لائن)نگران صوبائی وزیرصحت ڈاکٹرجاویداکرم نے چلڈرن ہسپتال لاہورمیں ”Thinking Beyond Type 1 Diabetes”کے عنوان پرمنعقدہ آگاہی سیمینارمیں بطورمہمان خصوصی شرکت کی۔اس موقع پر ایم ڈی چلڈرن ہسپتال پروفیسرڈاکٹرمحمدسلیم،یونیورسٹی آف چائلڈہیلتھ سائنسزسے چیئرپرسن پروفیسرڈاکٹرجیدامنظوراور یوکے سے آئے ڈاکٹرکیش پٹیل کے علاوہ ڈاکٹرزکی کثیرتعدادنے بھی شرکت کی۔
چلڈرن ہسپتال لاہورمیں پاکستان سوسائٹی آف انٹرنل میڈیسن کے زیراہتمام آگاہی سیمینارکاانعقادکیاگیا۔نگران صوبائی وزیرصحت ڈاکٹرجاویداکرم نے چلڈرن ہسپتال میں اس موقع پر آگاہی واک کی قیادت بھی کی۔مقررین نے شوگرکی بیماری پرقابوپانے کیلئے صحت مندزندگی گزرانے پرزوردیا۔نگران صوبائی وزیرصحت ڈاکٹرجاویداکرم نے کہاکہ پاکستان کی 27فیصدآبادی شوگرکی خطرناک بیماری کاشکارہے۔پاکستان میں شوگرکی بیماری بہت تیزی سے پھیل رہی ہے۔شوگراوربلڈپریشر انسان کو ہارٹ اٹیک ودیگربیماریوں میں مبتلاکردیتے ہیں۔ہمیں شوگرکی بیماری سے بچنے کیلئے زندگی کو اعتدال پسندی سے گزارناہوگا۔
ڈاکٹرجاویداکرم نے کہاکہ پاکستان سوسائٹی آف انٹرنل میڈیسن کے زیراہتمام لاہورمیں تین روزہ بین الاقوامی کانفرنس منعقدکی جارہی ہے۔کانفرنس میں شرکت کیلئے پوری دنیاکے ہیلتھ کئیرسسٹم سے متعلقہ طبی ماہرین آچکے ہیں۔صوبائی وزیر صحت نے یوکے سے آئے ڈاکٹرکیش پٹیل کی پاکستان آمدپرشکریہ اداکیا۔
