نیلم منیر

پاکستان کی معروف اداکارہ نیلم منیر پیا گھر سدھار گئیں

کراچی(رپورٹنگ آن لائن)پاکستان کی معروف اداکارہ نیلم منیر پیا گھر سدھار گئیں،اداکارہ نے نکاح کی تقریب کی جھلکیاں شیئر کرکے مداحوں کو خوش کردیا۔

نیلم منیر کی جانب سے تین جنوری کی شام کو نکاح کی تصاویر شیئر کی گئیں وائرل تصاویر میں نیلم منیر نے سفید رنگ کا لباس زیب تن کر رکھا ہے جبکہ انہیں عرب لباس میں ملبوس شخص کے ہمراہ رومانوی فوٹوشوٹ میں دیکھا جا سکتا ہے۔

فوٹو اور ویڈیو شیئرنگ ایپ انسٹاگرام پر وائرل ہونے والی تصاویر میں نیلم منیر کو شوہر کے ہمراہ دبئی کے مختلف مقامات پر خوشگوار موڈ میں دیکھا جاسکتا ہے۔اس سے قبل اداکارہ نے اپنی مایوں کی تقریب کی تصاویر سوشل میڈیا پر شیئر کی تھیں جن میں انہوں نے زرد رنگ کا روایتی لباس زیب تن کر رکھا تھا اور وہ تصاویر کراچی کے ایک خوبصورت مقام پر کیے گئے فوٹوشوٹ کی تھیں۔

نکاح کی تصاویر میں بیک گرانڈ میں دبئی کے مختلف مقامات نظر آرہے ہیں جن میں دنیا کی بلند ترین عمارت برج خلیفہ کو بھی دیکھا جا سکتا ہے۔اداکارہ نے تصاویر شیئر کرتے ہوئے تصدیق کی کہ انہوں نے نئی زندگی کا آغاز کردیا اور ساتھ ہی مداحوں سے دعاوں میں یاد رکھنے کی اپیل بھی کی ہے تاہم انہوں نے شوہر کا نام سمیت نکاح و شادی کی تقریبات کی دیگر تفصیلات نہیں بتائیں۔

اپنے شریک حیات کے ہمراہ تصاویر شیئر کرنے کے بعد ان کے مداحوں نے شریک حیات سے متعلق کمنٹ میں سوالات بھی کیے لیکن اس حوالے سے اداکارہ کی جانب سے کسی قسم کی معلومات فراہم نہیں کی گئیں۔متعدد سوشل میڈیا رپورٹس کے مطابق اداکارہ کے شوہر کا تعلق دبئی سے ہے اور وہ ایک کاروباری شخص ہیں۔

اداکارہ کی جانب سے نکاح کی تصاویر پر دیگر صارفین کی جانب تنقید بھی کی جارہی ہے،ایک صارف نے لکھا نیلم منیر نے حبیبی کم ٹو دبئی کو بہت سنجیدہ طور پر لے لیا ہے۔