لاہور( ر پورٹنگ آن لائن )بین الاقوامی آرڈرز کی بحالی کے باعث پاکستان کی غیر ٹیکسٹائل برآمدات میں 4فیصد سے زائد اضافہ ہوگیا، رواں مالی سال نو ماہ میں 7ارب 33 کروڑ ڈالر کی نان ٹیکسٹائل مصنوعات برآمد کی گئیں۔رپورٹ کے مطابق کورونا کے باعث دنیاکے مختلف ملکوں میں لاک ڈائون کے باوجود پاکستان کی لیدر گارمنٹس، سرجیکل آلات اور انجینئرنگ مصنوعات کی طلب میں نمایاں اضافہ ہوا۔
عالمی مارکیٹ میں کم طلب کی وجہ سے پاکستانی کھانے کی مصنوعات کی طلب میں کمی ہوئی۔ باسمتی چاول کی برآمد میں 27فیصد کمی، جبکہ نان باسمتی کی برآمد میں تقریباً 12فیصد اضافہ ہوا۔مصالحہ جات، تیل کے بیج اور میوہ جات کی برآمد میں بھی اضافہ ریکارڈ کیا گیا جبکہ مچھلی، سبزیوں اور پھلوں کی برآمد میں کمی ہوئی۔
