اسلام آباد (رپورٹنگ آن لائن)خاتونِ اوّل بی بی آصفہ بھٹو زرداری نے پولیو کے عالمی دن پر پولیو کے خاتمے اور ہر بچے کو قابل علاج بیماریوں سے بچانے کے لئے پاکستان کے عزم کا اعادہ کرتے ہوئے کہا ہے کہ پاکستان نے پولیو کے خلاف مسلسل پیشرفت کی ہے لیکن یہ کام ابھی مکمل نہیں ہوا ہے۔
جمعہ کو ایوانِ صدر کے پریس وِنگ کے مطابق ورلڈ پولیو ڈے کے موقع پر خاتونِ اوّل نے اپنے پیغام میں کہا کہ ہم سب کو متحد ہو کر پاکستان کو مکمل طور پر پولیو فری بنانا ہوگا، محترمہ بینظیر بھٹو شہید نے 1994 میں پاکستان میں پہلی قومی انسدادِ پولیو مہم کا آغاز کیا تھا، شہید محترمہ بینظیر بھٹو کا وژن آج بھی قومی انسدادِ پولیو مہم کی رہنمائی کررہا ہے۔
انہوں نے کہا کہ پولیو کے خلاف قومی مہم سے میرا ذاتی تعلق ہے، یہ سفر میری والدہ شہید محترمہ بینظیر بھٹو نے شروع کیا تھا، محترمہ بینظیر بھٹو شہید نے بطور وزیرِاعظم مجھے پولیو کے قطرے پلا کر پاکستان کی پہلی انسدادِ پولیو مہم کا آغاز کیا تھا۔ بی بی آصفہ بھٹو زرداری نے کہا کہ پاکستان نے پولیو کے خلاف نمایاں پیشرفت کی ہے مگر ہدف ابھی باقی ہے، ہر بچہ جس تک ویکسین نہ پہنچے خطرے میں ہے.
ہر گھر اور کمیونٹی تک رسائی ضروری ہے۔ خاتونِ اوّل بی بی آصفہ بھٹو زرداری نے پولیو مہم کے کارکنوں اور سکیورٹی اہلکاروں کی خدمات اور قربانیوں کو خراجِ عقیدت پیش کرتے ہوئے خواتین ویکسینیٹرز کے کردار اور خدمات کو سراہا۔
انہوں نے کہا کہ ان کی کوششوں نے پاکستان کو پولیو سے پاک مستقبل کے قریب پہنچایا ہے۔ انہوں نے والدین، سرپرستوں اور کمیونٹی رہنمائوں سے انسدادِ پولیو مہم میں بھرپور تعاون کی اپیل کی اور کہا کہ متحد ہو کر ہم اپنے بچوں کو محفوظ مستقبل دے سکتے ہیں۔
