اسلام آباد(رپورٹنگ آن لائن)وفاقی وزیر اطلاعات فواد چوہدری نے کہا ہے کہ پاکستان چین کی مدد سے سیمی کنڈیکٹرز زون قائم کرنا چاہتا ہے، منصوبے کا مقصد پاکستان کو جدید آلات میں خودکفیل بنانا اور ترقی کی نئی راہیں کھولنا ہے،
چائنہ اکنامک نیٹ کو دئیے گئے انٹرویو میں فواد چوہدری نے کہا کہ وزیراعظم عمران خان کے حالیہ دورہ چین کے دوران سیمی کنڈیکٹرز انڈسٹری کی پاکستان منتقلی کے بارے میں ہماری گفتگو ہوئی، یہ ٹیکنالوجی نہ صرف پاکستان بلکہ چین کے لئے بھی انتہائی اہم ہے، ہ وزیر اطلاعات نے کہا کہ م چاہتے ہیں کہ چین کی ٹیکنالوجی کمپنیاں پاکستان آئیں اور پاکستان کو سیمی کنڈیکٹرز مینوفیکچرنگ کا مرکز بنائیں، ہم پاکستان میں سیمی کنڈیکٹر ڈیزائننگ کا آغاز کرنا چاہتے ہیں، یہ بات باعث مسرت ہے کہ چینی سرمایہ کار پاکستان کے ساتھ کام کرنے میں بہت دلچسپی لے رہے ہیں اور ٹیکنالوجی زون کو سیمی کنڈیکٹرز زون میں بدل دیا جائے گا۔
فواد چوہدری نے کہا کہ سائنس و ٹیکنالوجی کا بہت بڑا شعبہ ہے جس میں دونوں ممالک تعاون کر سکتے ہیں،موبائل فونز اب پاکستان میں تیار ہو رہے ہیں لیکن ہم اس سے ایک قدم آگے بڑھتے ہوئے پاکستان میں موبائل فونز کی مکمل مینوفیکچرنگ شروع کرنا چاہتے ہیں۔صحت کے شعبہ میں آلات کے حوالے سے دوطرفہ تعاون میں اضافہ ہوا ہے جو انتہائی اہم ہے، انہوں نے کہا کہ کووڈ 19 کے ابتدائی چند ماہ میں ہم اس شعبہ سے متعلق ہر چیز درآمد کر رہے تھے لیکن اب پاکستان اس حوالے سے ایک بڑا برآمد کنندہ ملک ہے، یہ سنگ میل ہم نے مختصر عرصے میں حاصل کیا ہے،پاکستان کے پاس ہنر مند لیبر اور ایک بڑی مارکیٹ ہے۔
ہمیں امید ہے کہ چینی ٹیک کمپنیاں ٹیکنالوجی زون میں ہماری مدد کریں گی اور اس طرح ہم ان شعبوں میں کامیابی سے ابھر سکیں گے، امید ہے کہ وزیراعظم پاکستان کے حالیہ دورہ چین کے بعد بہت سی چینی ٹیکنالوجی کمپنیاں پاکستان آئیں گی، سیمی کنڈیکٹر ہر ٹیکنالوجی کا بنیادی عنصر ہوتا ہے جس سے مقامی مینوفیکچرنگ مصنوعات میں ویلیو ایڈیشن لانے میں مدد ملے گی،یہ بات قابل ذکر ہے کہ وزیراعظم عمران خان نے اپنے دورے کے دوران چین کی معروف ٹیکنالوجی کمپنیوں کے رہنماﺅں سے ملاقاتوں کا سلسلہ جاری رکھا دونوں اطراف نے سافٹ ویئر ڈویلپمنٹ، انفارمیشن اینڈ کمیونیکیشن ٹیکنالوجی، طبی تشخیص اور دیگر متعلقہ شعبوں میں تعاون بڑھانے پر اتفاق کیا۔
