نیویارک(رپورٹنگ آن لائن) پاکستان نے افغانستان میں دہشتگردوں کو غیر قانونی اسلحے تک رسائی علاقائی امن کیلئے خطرہ قرار دیدی۔
میڈیا رپورٹ کے مطابق اقوام متحدہ کی سلامتی کونسل میں پاکستانی مستقل مندوب عاصم افتخار نے اظہار خیال کرتے ہوئے کہا کہ دہشت گرد افغانستان سے کھلے عام کارروائیاں کر رہے ہیں، افغانستان میں جدید اسلحے اور گولہ بارود کے ذخائر پر تشویش ہے، عالمی برادری افغان حکام کو وعدوں پر عملدر آمد کا پابند بنائے۔
عاصم افتخار نے واضح کیا کہ دہشت گرد افغانستان سے کھلے عام کارروائیاں کر رہے ہیں اور مصدقہ معلومات ہیں کہ یہ اسلحہ دہشت گردی کے مقاصد کے لئے پڑوسی ممالک میں سمگل کرنے کی کوششیں کی جا رہی ہیں، پاکستان افغانستان سرحد سے پکڑا گیا اسلحہ انہی ذخائر سے منسلک ہے جو غیر ملکی افواج کے انخلا کے بعد افغانستان میں چھوڑ دیا گیا تھا۔
پاکستانی مندوب نے سلامتی کونسل کو بتایا کہ افغانستان میں موجود دہشت گرد گروہ، خصوصاً داعش، تحریک طالبان پاکستان، بلوچ لبریشن آرمی اور مجید بریگیڈ ان جدید ہتھیاروں کا استعمال پاکستان کے عام شہریوں اور قانون نافذ کرنے والے اداروں کے خلاف کر رہے ہیں جس سے ہزاروں بے گناہ جانیں ضائع ہو چکی ہیں۔انہوں نے عالمی برادری پر زور دیا کہ وہ دہشت گرد گروہوں کی اسلحے تک رسائی روکنے کے لئے مؤثر اقدامات کرے اور اس بات کو یقینی بنائے کہ افغان عبوری حکام اپنے بین الاقوامی وعدوں اور ذمہ داریوں کی پاسداری کریں۔
