اسلام آباد (رپورٹنگ آن لائن) وفاقی وزیر اطلاعات ونشریات فوا د چوہدری نے کہا ہے کہ پاکستان میں بیٹھ کر پاکستان اور فوج کے خلاف ٹرینڈز چلانے والے اور ان کا دفاع کرنیوالے آج افغانستان کی صورتحال سے آنکھیں چرارہے ہیں۔ اپنے بیان میں انہوںنے کہاکہ عوام صرف تب محفوظ ہوتی ہے جب ادارے مضبوط ہوں۔
انہوںنے کہاکہ ہمیں اللہ کا شکر کرنا چاہئے کہ پاک فوج اور دیگر ادارے تسبیح جیسی ترتیب میں ہمارے گرد حصار بنائے ہوئے ہیں۔ انہوںنے کہاکہ افغانستان کے حکمرانوں نے عشروں ملک کو لوٹا وسائل ادارے بنانے پر نہیں لگائے بلکہ ذاتی تجوریاں بھریں۔وفاقی وزیر اطلاعات نے کہاکہ اس کا نتیجہ ہے کہ آج ان کا دفاعی حصارریت کی دیوار ثابت ہوا ہے۔انہوںنے کہاکہ ہمیں آزادی کی قدر اور ملک کی اہمیت سے روشناس رہنا چاہئے، اور جھوٹے پراپیگنڈوں سے ہشیار بھی رہنا چاہئے۔
