لاہور( رپورٹنگ آن لائن) امریکہ میں مقیم سینئر اداکارہ صوفیہ احمد نے کہا ہے کہ مہذب معاشروں کی فہرست میں نام شامل کرانے کیلئے جس سمت میں چلنے کی ضرورت ہے ابھی تک ہم اس پر گامزن نہیں ہوئے ،پاکستان میں آج بھی قانون اپنا وزن طاقتور کے پلڑے میں ڈالتا ہے اور وسائل نہ رکھنے والا حق پر ہونے کے باوجود دربدر کی ٹھوکریںکھانے پر مجبور ہے ۔ایک انٹر ویو میں صوفیہ احمد نے کہا کہ تبدیلی ہمیشہ خود سے شروع ہوتی ہے لیکن بد قسمتی سے پاکستان میں دوسروں کی خامیاں نکالنے اور انہیں ٹھیک کرنے کیلئے کوشش کرنے کا تو رواج عام ہے لیکن ہم خود کو ٹھیک کرنے کیلئے تیار نہیں ۔
جو ادارے قانون کی پاسداری کرانے کے ذمہ دار ہیں وہی اس کی دھجیاں بکھیرتے ہیں ایسے میں کیسے قانون کی عملداری کو یقینی بنایا جاسکتا ہے ۔ انہوں نے کہا کہ میں نے معاشرے میں تیزی سے پھیلتی ہوئی برائی کے خلاف آوازبلند کی تو مجھے دھمکیاں دی گئیں اور یہاں تک کہ مجھے اپنا ملک چھوڑنا پڑا اور اس کے باوجود کسی کے کان پر جوں تک نہیں رینگی کہ پاکستان کی خاتون شہری کیوں اپنا ملک چھوڑنے پر مجبور ہوئی ۔
