اسلام آ باد (رپورٹنگ آن لائن ) صدر مملکت ڈاکٹر عارف علوی نے کہا ہے کہ پاکستان میں آئی ٹی شعبے کے فروغ کی ضرورت ہے، پاکستان میں کاروبار کرنے میں آسانی بڑھانے اور آئی ٹی شعبے کے فروغ کی ضرورت ہے، انفارمیشن ہائی وے کی تعمیر میں تیزی لانے کی ضرورت ہے، محدود وسائل اور حکومتی ضروریات کے باوجود ٹیلی کام سیکٹر کو مراعات میں توازن اپنایا گیا ہے۔
ڈاکٹر عارف علوی نے اسلام آباد میں قومی براڈ بینڈ نیٹ ورک فورم سے خطاب کرتے ہوئے کہا کہ آئی ٹی کمپنیاں پاکستان میں زیادہ سے زیادہ سرمایا کاری کریں، معیشت ڈیجیٹل بنانے سے ملکی مجموعی پیداوار میں اضافہ ہوگا، ہم کوشش کر رہے ہیں کہ پاکستان میں فن ٹیک اور ای بینکنگ کو فروغ حاصل ہو۔ انہوں نے کہا کہ ٹیکنالوجی کے فروغ اور آئی ٹی شعبے کی ترقی کیلئے ترجیحات کا تعین کرنا ہوگا، ٹیکنالوجی تیزی سے ترقی کر رہی ہے، ڈیٹا کی مقدار میں اضافہ ہوا، بڑھتے علم اور ڈیٹا کے تجزیے کیلئے آئی ٹی گریجویٹس کی تعداد میں اضافے کی ضرورت ہے۔
ڈاکٹر عارف علوی کا کہنا تھا کہ پاکستانی گریجویٹس کو مارکیٹ کی ضرورت کے مطابق تعلیم اور ہنر دینے کی ضرورت ہے، ملک کی ترقی کیلئے ڈیٹا کے تجزیہ کی اہمیت بڑھ گئی ہے۔ صدر مملکت ڈاکٹر عارف علوی نے مزید کہا کہ جن ممالک میں ٹیکنالوجی کے حوالے سے نظریاتی تبدیلی آئی، وہ ترقی کرگئے، خوشی ہے کہ پاکستان میں 50 فیصد آبادی کو انٹرنیٹ کی سہولت میسر ہے۔
