اسلام آباد (رپورٹنگ آن لائن)پاکستان مسلم لیگ (ن) نے میڈیا ڈیویلپمنٹ اتھارٹی کومسترد کر دیا ۔ پاکستان مسلم لیگ (ن)کی ترجمان مریم اورنگزیب نے اپنے بیان میں کہاکہ سلیکٹڈ ٹولے کی میڈیا ڈیویلپمنٹ اتھارٹی نا منظور اور مسترد کرتے ہیں،میں بتاتی ہو میڈیا ڈیولپمنٹ اتھارٹی کیوں لا رہے ہیں ۔
انہوںنے کہاکہ کوئی عمران صاحب کو تاریخی الیکشن چور، سلیکٹڈ،کرپٹ نہ کہے، اِس لئے میڈیا ڈیویلپمنٹ اتھارٹی لا رہے ہیں۔ انہوںنے کہاکہ آپ ملک میں آمریت، فسطائیت ،بے جی پی اور نازی پارٹی کی سوچ مسلط کررہے ہیں، اس لئے یہ ڈرامہ کیاجارہا ہے ۔ انہوںنے کہاکہ سچ کا گلا گھوٹنے والی کٹھ پتلیاں جھوٹ کی پیروکار ہیں،اس لئے میڈیا ڈیویلپمنٹ اتھارٹی کے نام پر آمریت مسلط کی جارہی ہے ۔ انہوںنے کہاکہ عمران صاحب میڈیا اتھارٹی بل کے ذریعے ملک میں سول مارشل لاء ایڈمنسٹریٹر بننا چاہتے ہیں ۔ انہوںنے کہاکہ منتخب اور عوام کی نمائندہ حکومت عوام اور میڈیا کی رائے، تنقید سے نہیں گھبراتی، منتخب اور مسلط میں یہی فرق ہے ۔
انہوںنے کہاکہ ہمارے ملک میں22 کروڑ عوام ہیں جس کا عمران صاحب آٹا اور چینی کھا گئے ، اِس لئے میڈیا اتھارٹی لا رہے ہیں ،عوام کا بجلی گیس اور وزگار چوری کر لیا، اِس پر میڈیا بات نہ کرے اِس لئے میڈیا اتھارٹی لا رہے ہیں ۔ انہوںنے کہاکہ تین سال سے میڈیا اور صحافیوں پہ حملے اور اب میڈیا ڈیویلپمنٹ اتھارٹی لا رہے ہیں،دن دیہاڑے صحافیوں کو گولیاں مارنے، ڈنڈے برسانے اور کوئی بات نہ کرے، اِس لئے میڈیا اتھارٹی لا رہے ہیں۔ انہوںنے کہاکہ تاریخی مہنگائی اور قرض پر کوئی بات نہ کرے، اِس لئے میڈیا ڈیویلپمنٹ اتھارٹی لا رہے ہیں،74 سال کی اس نالائق ، نااہل اور کرپٹ ترین حکومت پر کوئی بات نہ کرے، اس لئے میڈیا ڈیویلپمنٹ اتھارٹی لا رہے ہیں۔ انہوںنے کہاکہ ظالمانہ مہنگائی ، بدترین خسارے ، قرض پر کوئی بات نہ کرے، اِس لئے میڈیا ڈیویلپمنٹ اتھارٹی لا رہے ہیں۔
انہوںنے کہاکہ کشمیر فروشوں کو کشمیر فروش نہ کہو اِس لئے میڈیا ڈیویلپمنٹ اتھارٹی لا رہے ہیں، میڈیا اتھارٹی عوام کی آئین میں دی گئی اظہار رائے کی آزادی سلب کرنے اور الیکشن چوری کرنے کے لئے لائی جا رہی ہے۔ انہوںنے کہاکہ ایک طرف عمران مافیا کی الیکٹرونک ووٹنگ مشین اور دوسری طرف میڈیا ڈیولپمنٹ اتھارٹی ؟عوام سب جانتے ہیں،الیکٹرونک ووٹنگ مشین ووٹ دے تو اخبار، ٹی وی ، سوشل میڈیا کا منہ بند رہے، اِس لئے میڈیا ڈیویلپمنٹ اتھارٹی لائی جا رہی ہے
