اسلام آباد(رپورٹنگ آن لائن)وفاقی وزیر انسانی حقوق سینیٹر اعظم نذیر تارڑ نے عالمی یوم نسواں کے موقع پر خواتین کی گراں قدر خدمات کا اعتراف کرتے ہوئے صنفی مساوات اور خواتین کو بااختیار بنانے کے اپنے عزم کا اعادہ کیاہے۔
عالمی یوم نسواں کے موقع پر اپنے پیغام میں انہوںنے کہاکہ ایک منصفانہ اور ترقی یافتہ معاشرہ اسی وقت ممکن ہے جب خواتین کو مساوی حقوق و مواقع میسر ہوں، ان کے حقوق کا موثر تحفظ یقینی بنایا جائے اور وہ ہر طرح کے امتیازی سلوک اور تشدد سے محفوظ رہیں۔وفاقی وزیر اعظم نذیر تارڑ نے کہا کہ پاکستان خواتین کے حقوق کے تحفظ کیلئے اپنے آئینی اور بین الاقوامی وعدوں کی پاسداری کیلئے پرعزم ہے.
حکومت صنفی بنیاد پر تشدد، کام کی جگہ پر ہراسانی اور کم عمری کی شادی جیسے سنگین مسائل کے خلاف قوانین کو مزید موثر بنانے کیساتھ ساتھ ادارہ جاتی معاونت کیلئے ہیلپ لائنز، تحفظ مراکز اور شکایات ازالہ سیلز کو مزید فعال کر رہی ہے۔انہوں نے کہا کہ وزارت انسانی حقوق شراکت دار اداروں کے تعاون سے کلیدی پالیسی اقدامات، آگاہی مہمات اور تربیتی پروگرامز کے ذریعے خواتین کے حقوق کے تحفظ اور ان کے وقار و خودمختاری کے فروغ کیلئے سرگرمِ عمل ہے۔
وفاقی وزیرنے کہاکہ اس موقع پر ہم خواتین کی معاشرتی، معاشی اور قومی ترقی میں بے مثال خدمات کو خراج تحسین پیش کرتے ہیں اور اس عزم کا اعادہ کرتے ہیں کہ ایک ایسا معاشرہ تشکیل دیا جائے جہاں ہر خاتون بلا خوف و امتیاز اپنے حقوق سے مستفید ہو سکے،آئیے ہم سب مل کر مساوات، انصاف اور ترقی کے یکساں مواقع کی فراہمی کے لیے مشترکہ جدوجہد کریں۔
