اسلام آباد (رپورٹنگ آن لائن)وفاقی وزیر اطلاعات، نشریات، قومی ورثہ و ثقافت عطاء اللہ تارڑ نے کہا ہے کہ وزیراعظم شہباز شریف کی زیر قیادت پاکستان کی کامیاب خارجہ پالیسی کی بدولت معاشی ترقی کا سفر جاری ہے، پاکستان اور سعودی عرب کے درمیان طے پانے والے معاہدے حقیقت کا روپ دھار رہے ہیں، سرمایہ کاری کا فروغ اور معاشی تعاون میں اضافہ حکومت کی اولین ترجیح ہے، وزیراعظم شہباز شریف کا دورہ سعودی عرب اور سعودی ولی عہد محمد بن سلمان کے ساتھ ملاقات انتہائی اہم رہے، پاک سعودی تعلقات نے ایک نیا موڑ لیا ہے۔
بدھ کو وزیراعظم محمد شہباز شریف کے حالیہ دورہ سعودی عرب کے حوالے سے گفتگو کرتے ہوئے وفاقی وزیر اطلاعات نے کہا کہ وزیراعظم محمد شہباز شریف سعودی عرب کا کامیاب دورہ مکمل کر کے وطن واپس آ گئے ہیں، وزیراعظم کا دورہ انتہائی اہمیت کا حامل رہا۔ انہوں نے کہا کہ گزشتہ چھ ماہ کے دوران سعودی ولی عہد محمد بن سلمان کے ساتھ وزیراعظم شہباز شریف کی پانچویں ملاقات تھی۔
وفاقی وزیر نے کہا کہ مختصر عرصے میں پاکستان اور سعودی عرب کے درمیان تعلقات میں بہت زیادہ بہتری آئی ہے، دونوں ملکوں کے درمیان تعلقات مزید مضبوط ہوئے ہیں۔ وزیر اطلاعات نے کہا کہ سعودی عرب پاکستان میں اربوں ڈالر کی سرمایہ کاری کرنے جا رہا ہے، دونوں ملکوں کے درمیان طے پانے والے معاہدے حقیقت کا روپ اختیار کر رہے ہیں۔ انہوں نے کہا کہ سعودی عرب کے بڑے منصوبے پاکستان میں شروع ہو رہے ہیں، سعودی عرب کے ساتھ 28 ایم او یوز پر دستخط ہوئے تھے جن میں سے آٹھ منصوبوں پر کام شروع ہو چکا ہے۔
انہوں نے کہا کہ وزیراعظم نے سعودی عرب میں واٹر سمٹ سے خطاب کیا اور فرانس کے صدر میکرون سے بھی ملاقات کی۔ انہوں نے کہا کہ وزیراعظم شہباز شریف اور ولی عہد کے درمیان گزشتہ روز تاریخی ملاقات ہوئی۔ پاک سعودی تعلقات نے ایک نیا موڑ لیا ہے۔ انہوں نے کہا کہ وزیراعظم محمد شہباز شریف کی سرمایہ کاری پر بھرپور توجہ ہے، حکومت کے معاشی اقدامات کی بدولت پاکستان میں چھ سال بعد مہنگائی4.8 فیصد پر آ چکی ہے، سٹاک مارکیٹ ایک لاکھ پوائنٹس کی حد عبور کرگئی ہے، شرح سود 15 فیصد اور کائیبور 13 فیصد پر آگیا ہے، مہنگائی چھ سال کا ریکارڈ توڑ کر کم ترین سطح پر آگئی ہے۔
وفاقی وزیر نے کہا کہ پی ٹی آئی حکومت کے دوران جہاں دوست ممالک کے ساتھ تعلقات خراب ہوئے وہاں ان کی معیشت پر بھی کوئی توجہ نہیں تھی، آج دنیا بھر کے رہنما ء پاکستان کی معاشی بحالی و ترقی کو سراہا رہے ہیں، معیشت ترقی کر رہی ہے، تمام معاشی اشاریئے بہتر ہو رہے ہیں۔ انہوں نے کہا کہ دنیا بھر سے رہنما پاکستان آ رہے ہیں، حال ہی میں بیلاروس کے صدر پاکستان کا دورہ مکمل کر کے گئے۔ وفاقی وزیر نے کہا کہ سعودی عرب کے ولی عہد نے ہمیشہ گرمجوشی کا مظاہرہ کیا، وہ پاکستان کیلئے اچھے تاثرات رکھتے ہیں، وزیراعظم شہباز شریف کی ان کے ساتھ ملاقات غیر معمولی رہی۔
انہوں نے کہا کہ دونوں ممالک کے تعلقات میں مزید بہتری آئی ہے، سعودی قیادت نے حکومت پاکستان کی جانب سے منصوبوں کے آغاز پر اطمینان کا اظہار کیا ہے۔ انہوں نے کہا کہ سرمایہ کاری کا فروغ اور معاشی تعاون میں اضافہ حکومت کی اولین ترجیح ہے، آنے والے دنوں میں پاکستان میں مزید سرمایہ کاری آئے گی، روزگار پیدا ہوں گے، مہنگائی کم ہوگی، عوام کو ریلیف ملے گا۔ وزیر اطلاعات نے کہا کہ پاکستان کی خارجہ پالیسی بہت کامیابی سے آگے بڑھ رہی ہے، سعودی عرب اور پاکستان مشکل وقت کے ساتھی ہیں، وزیراعظم شہباز شریف نے خادم الحرمین الشریفین کے لئے نیک خواہشات کا اظہار کیا۔
دونوں ممالک نے تجارت اور سرمایہ کاری کے حوالے سے تعاون کو مزید بڑھانے اور مثالی تعلق کو مزید مضبوط کرنے پر اتفاق کیا ہے۔ انہوں نے کہا کہ وزیراعظم کا سعودی عرب کا دورہ ایک اہم سنگ میل تھا۔ وزیراعظم نے واٹر سمٹ میں پاکستان کا بھرپور موقف پیش کیا، وہاں انڈس واٹر ٹریٹی کی بھی بات کی اور پاکستان کی اہمیت اور ضرورت کو اجاگر کیا۔ انہوں نے کہا کہ سعودی عرب کے ساتھ تعلقات مزید مستحکم ہوں گے اور پاکستان کی معیشت مزید ترقی کرے گی۔
٭٭٭٭٭
