اسلام آ باد (رپورٹنگ آن لائن)اسپیکر قومی اسمبلی اسد قیصر نے کہا ہے کہ پاکستان اور افغانستان کی ترقی اور خوشحالی ایک دوسرے سے جڑی ہوئی ہے، افغانستان کی عوام کے ساتھ ہمارا خونی رشتہ ہے، وزیراعظم عمران خان افغانستان کے ساتھ تجارت اور ٹرانزٹ ٹریڈ کے فروغ کے لیے گہری دلچسپی رکھتے ہیں، افغانستان کے ساتھ ویزا پالیسی میں خصوصی نرمی کی گئی ہے، طلباءکے لیے ویزہ پالیسی میں نرمی کے ساتھ ساتھ ویزا کی مدت میں اضافہ بھی کیا گیا ہے، خطے کی ترقی اور خوشحالی کے لیے دونوں ممالک کو مشترکہ حکمت عملی اپنانی ہو گی، پاکستان کی موجودہ حکومت افغانستان کے ساتھ برادارنہ اور تجارتی تعلقات کی خواہاں ہے۔
جمعرات کو اسپیکر قومی اسمبلی اسد قیصر نے پاکستان افغانستان مشترکہ چیمبر آف کامرس اینڈ انڈسٹری کی تقریب سے خطاب کرتے ہوئے کہا کہ پاکستان اور افغانستان کی ترقی اور خوشحالی ایک دوسرے سے جڑی ہوئی ہے، افغانستان کی عوام کے ساتھ ہمارا خونی رشتہ ہے، پاک-افغان پارلیمانی فرینڈ شپ گروپ کی ایگزیکٹو کمیٹی نے دوطرفہ عوامی سطح پر رابطوں میں تیزی لانے کے لیے اہم کردار ادا کیا ہے، پاک-افغان ٹرانزٹ ٹریڈ کو مستحکم بنانے کے لیے ایگزیکٹو کمیٹی نے قابل ستائش کردار ادا کیا،
اسد قیصر نے کہا وزیراعظم پاکستان عمران خان افغانستان کے ساتھ تجارت اور ٹرانزٹ ٹریڈ کے فروغ کے لیے گہری دلچسپی رکھتے ہیں، افغانستان کے ساتھ ویزا پالیسی میں خصوصی نرمی کی گئی ہے، طلباءکے لیے ویزہ پالیسی میں نرمی کے ساتھ ساتھ ویزا کی مدت میں اضافہ بھی کیا گیا ہے، افغان بھائیوں کی مشکلات میں پاکستان افغانستان کے شانہ بشانہ کھڑا ہے، افغانستان اور پاکستان کے مابین تجارت اور ٹرانزٹ ٹریڈ کی راہ میں حائل رکاوٹوں کو دور کرنے کے لیے تمام وسائل کو بروئے کار لایا جائے گا، خطے کی ترقی اور خوشحالی کے لیے دونوں ممالک کو مشترکہ حکمت عملی اپنانی ہو گی،
اسد قیصر نے کہا افغانستان اور پاکستان نے ملکر آگے بڑھنا ہے، پاکستان اور افغانستان کی آنے والی نسلوں کے مستقبل کا مسئلہ ہے، ٹرانزٹ ٹریڈ کی راہ حائل رکاوٹوں کو دور کرنے کے لیے پاک-افغان فرینڈ شپ گروپ کی ایگزیکٹو کمیٹی بنائی، وسطی ایشیائی ممالک کے ساتھ تجارت افغانستان اور پاکستان کیلئے انتہائی اہم ہے، پاکستان اور افغانستان کے مابین تجارت میں تیزی افغانستان کے ساتھ تجارت میں آسانی پر ہے،
اسپیکر قومی اسمبلی نے کہا وسطی ایشیائی ریاستوں کے ساتھ تجارت کے فروغ کے وسیع مواقع موجود ہیں، اقوام متحدہ سمیت بین الاقوامی فورمز کو نئی افغان حکومت کی مدد کرنے کی ضرورت ہے، افغانستان میں پائیدار امن کا قیام خطے میں امن و استحکام کیلئے ناگزیر ہے، پاکستان کی موجودہ حکومت افغانستان کے ساتھ برادارنہ اور تجارتی تعلقات کی خواہاں ہے۔
