اسلام آباد(رپورٹنگ آن لائن ) معاون خصوصی قومی سلامتی ڈاکٹر معید یوسف نے کہا ہے کہ پاکستان اور افغانستان مشترکہ مفادات رکھتے ہیں۔ تفصیلات کے مطابق معاون خصوصی برائے قومی سلامتی ڈاکٹر معید یوسف کے زیر صدارت پاک افغان ٹریک ٹو مذاکرات سے متعلق اجلاس ہوا جس میں افغانستان میں امن عمل پر تبادلہ خیال کیا گیا۔
اس موقع پر ڈاکٹر معید یوسف نے کہا کہ پاکستان اور افغانستان مشترکہ مفادات رکھتے ہیں،پاکستان اور افغانستان کے مابین مربوط معیشت ہونی چاہئے۔ معاون خصوصی برائے قومی سلامتی کاکہناتھا کہ پاکستان اس بات پر یقین رکھتا ہے کہ دونوں ممالک کی معاشی خوشحالی ایک دوسرے سے جڑی ہوئی ہے،پاکستان اقتصادی سلامتی پر کام کر رہا ہے،پاکستان،افغانستان کو معاشی طور پر مضبوط دیکھنا چاہتا ہے،افغانستان میں امن وسطی ایشیا کے ساتھ رابطے کے لئے بہت ضروری ہے۔
افغان وفد کا کہنا تھا کہ افغانستان میں امن و استحکام کو یقینی بنانے کے لئے پاکستان کی کوششیں قابل تعریف ہیں،دونوں ممالک کے مابین تجارتی تعلقات اور عوام سے عوام کے رابطوں میں مزید پیشرفت ہو گی۔
