اسلام آباد (رپورٹنگ آن لائن)پاکستان تحریکِ انصاف کے رہنما بیرسٹر محمد علی سیف نے کہا ہے کہ ٹرانسپرنسی انٹرنیشنل کی رپورٹ کے مطابق پنجاب اور سندھ کے مقابلے میں خیبر پختونخوا کا انڈیکس کافی بہتر ہے.
بیرسٹر محمد علی سیف نے ٹرانسپیرنسی انٹرنیشنل رپورٹ پر ردِ عمل کا اظہار کرتے ہوئے کہا کہ بین الاقوامی ادارے کی رپورٹ میں کرپشن کے انڈیکس میں کمی خوش آئند ہے۔بیرسٹرسیف نے کہاکہ رپورٹ اس بات کی نشاندہی کرتی ہے کہ ملک میں مزید بہتری کی گنجائش موجود ہے، ملک میں آئین و قانون کی بالادستی قائم ہو تو کرپشن میں مزید کمی لائی جا سکتی ہے۔
انہوں نے کہا کہ ملک کو بہتری کی جانب گامزن کرنے کے لیے موجودہ تصادم کی کیفیت کا خاتمہ ضروری ہے، سیاسی تلخیوں اور تصادم کی سیاست سے ملک ترقی نہیں کر سکتا۔بیرسٹر سیف نے کہا کہ موجودہ دور تمام سیاسی قوتوں سے اتحاد و اتفاق کے ساتھ آگے بڑھنے کا تقاضا کرتا ہے۔
