لاہور (رپورٹنگ آن لائن) اسپیکر پنجاب اسمبلی چودھری پرویزالہی نے کہا ہے کہ وکلا ہمارے معاشرے کا اہم جزوہیں ، وکلا کی فلاح و بہبود کیلئے فنڈز مختص اور ان کیلئے تاریخی اعلانات کیے گئے ہیں، وکلا برادری کیلئے ہاوسنگ سوسائٹی جیسے منصوبے بھی شروع کیے گئے ہیں ۔
تفصیلات کے مطابق اسپیکر پنجاب اسمبلی چودھری پرویزالہی اور وفاقی وزیر برائے ہاوسنگ طارق بشیر چیمہ سے حاجی محمد افضل دھرالہ چیئرمین ایگزیکٹو کمیٹی پنجاب بار کونسل، فرحان شہزاد وائس چیئرمین پنجاب بار کونسل اور میاں عبدالرحمن غفوریا ایڈووکیٹ کی ملاقات ہوئی جس میں چودھری پرویزالہی نے کہا کہ وکلا برادری انصاف کی فراہمی کیلئے جدوجہد کر رہی ہے، ہم اس جدوجہد میں ان کے ساتھ ہیں۔
ان کا کہنا تھا کہ پہلی بار ہمارے دور میں تحصیل سطح تک بار ایسوی ایشنز کو اہمیت دی گئی ہے، وکلا کی فلاح و بہبود کیلئے فنڈز مختص اور ان کیلئے تاریخی اعلانات کیے گئے ہیں۔ چودھری پرویزالہی نے کہا کہ وکلا کیلئے فری میڈیکل کی سہولت، بائی پاس اور دل کا علاج بھی فری کرنے کا انتظام کیا گیا ہے، وکلا برادری کیلئے ہاوسنگ سوسائٹی جیسے منصوبے بھی شروع کیے گئے ہیں۔ وکلا رہنما کا کہنا تھا کہ چودھری پرویزالہی کی وکلا کیلئے خدمات کی وجہ سے وکلا برادری ہمیشہ آپ کو قدر کی نگاہ سے دیکھتی رہے گی۔
