اسلام آباد (رپورٹنگ آن لائن ) وفاقی کابینہ نے گندم کی امدادی قیمت میں مزیداضافے کامطالبہ مسترد کرتے ہوئے گندم کی امدادی قیمت 1650 روپے برقرار رکھنے کا فیصلہ کرلیا ، وزیراعظم نے کہا مہنگائی کو ہر صورت میں قابو کیا جائے۔
تفصیلات کے مطابق وزیراعظم عمران خان کی زیر صدارت وفاقی کابینہ کا اجلاس ہو ا، جس میں ملکی و سیاسی صورتحال سمیت 9 نکاتی ایجنڈے کا جائزہ لیا گیا اور متعدد نکات کی منظوری دے دی گئی۔ وفاقی کابینہ نے گندم کی امدادی قیمت میں مزید اضافے کا مطالبہ مسترد کردیا اور گندم کی امدادی قیمت 1650 روپے برقرار رکھنے کا فیصلہ کیا۔
اجلاس میں مہنگائی کے مسئلے پر تفصیلی بحث کی گئی، وزیراعظم عمران خان نے کہا مہنگائی کو ہر صورت میں قابو کیا جائے۔ اجلاس میں انتہا پسندی ،تشدد کیخلاف بیانیے پرعملدرآمد سے متعلق قومی کمیشن اور سعودیہ کیجانب سےڈیجیٹل کارپوریشن آرگنائزیشن کےآغازکی منظوری دی گئی۔کابینہ کوسبسڈیز اورگرانٹ کے حوالے سے بریفنگ بھی دی گئی جبکہ ٹی ڈیپ کورجسٹریشن کیلئے رجسٹرانٹ باڈی نوٹیفائی کرنے ، وزارت داخلہ کومختلف کیسوں میں تحقیقات کیلئے اجازت دینے کی منظوری دے دی۔ سینڈک میٹلزلمیٹڈ بورڈ میں ڈائریکٹرز کی نامزدگیوں اور فارمیسی کونسل کی تشکیل نو کیلئے نامزدگیوں کا معاملہ موخر کردیا گیا جبکہ 28 اکتوبر کے ای سی سی کے فیصلوں اور کابینہ توانائی کمیٹی کے29اکتوبرکےفیصلوں کی بھی توثیق کردی گئی۔
