اسلام آباد(رپورٹنگ آن لائن) وزیراعظم عمران خان نے وفاقی کابینہ کا اجلاس جمعرات کو طلب کرلیا، جس میں کورونا ویکسین کی ریٹیل پرائس سے متعلق فیصلہ کیا جائے گا۔
تفصیلات کے مطابق وزیراعظم عمران خان کی زیرصدارت وفاقی کابینہ کا اجلاس جمعرات کو ہوگا، جس میں ملک کی سیاسی اور اقتصادی صورتحال سمیت 22نکاتی ایجنڈے پرغور کیا جائے گا۔اجلاس میں کابینہ کو کورونا وبا ، ویکسی نیشن کے معاملے ، الیکٹرانک ووٹنگ مشین کے استعمال اور اوورسیزپاکستانیوں کےووٹنگ رائٹس پر بھی بریفنگ دی جائےگی۔کابینہ اجلاس میں کورونا ویکسین کی ریٹیل پرائس سے متعلق فیصلہ کیا جائے گا اور ڈرگز کی زیادہ سے زیادہ اور کوویڈ ویکسین کی زیادہ سے زیادہ ریٹیل قیمت کی منظوری دی جائے گی۔
اجلاس میں براڈ شیٹ انکوائری کمیشن کی رپورٹ پیش کی جائے گی اور کابینہ رپورٹ پبلک کرنے سے متعلق فیصلے کی منظوری دے گی۔پبلک سیکٹرز آرگنائزیشن کےسربراہوں کی خالی پوسٹوں پر بریفنگ ، پی آئی اے سی ایل بورڈ کے چیئرمین کی تعیناتی اور پی او ایف بورڈ کے ممبران کی تعیناتی ایجنڈے میں شامل ہیں۔
رولز بزنس 1973میں ترمیم کا معاملہ کابینہ کے سامنے رکھا جائے گا جبکہ این آئی ایچ کے ای ڈی کی پروموشن اور نیپرا کے ممبران کی تعیناتی ایجنڈے میں شامل ہیں۔وفاقی کابینہ اقتصادی رابطہ کمیٹی اور سی سی ایل سی کے فیصلوں کی توثیق کرے گی۔
