اسلام آباد(رپورٹنگ آن لائن)وفاقی وزیر برائے پٹرولیم علی پرویز ملک سے پاکستان میں امریکی ناظم الامور نیتالی بیکر نے ملاقات کی۔ ملاقات میں دوطرفہ توانائی تعاون، پائیدار ترقی اور پاک امریکہ تعلقات کے فروغ پر تبادلہ خیال کیا گیا۔
ترجمان پٹرولیم ڈویژن کی جانب سے جاری اعلامیہ کے مطابق ملاقات میں امریکہ اور پاکستان کے درمیان توانائی کے شعبے میں شراکت داری بشمول قابلِ تجدید توانائی کے منصوبے، معدنیات، ہائیڈروکاربنز اور بنیادی ڈھانچے کی سرمایہ کاری، توانائی کے اہم چیلنجز، ٹیکنالوجی کی جدت اور پاکستان کی بڑھتی ہوئی توانائی کی ضروریات کو پورا کرنے کے لئے پالیسی اقدامات پر توجہ مرکوز کی گئی۔
مزید برآں دونوں رہنماؤں نے باہمی فائدے کی شراکت اور توانائی شعبے کی پائیداری کے لئے مستقبل کے لائحہ عمل پر بھی تبادلہ خیال کیا۔ اس موقع پر وفاقی وزیر علی پرویز ملک نے امریکی حکومت کے مسلسل تعاون کا خیرمقدم کرتے ہوئے کہا کہ پاکستان امریکہ کے ساتھ اپنے سٹریٹجک تعلقات کو اہمیت دیتا ہے اور چاہتا ہے کہ یہ تعلقات ڈویلپمنٹ پارٹنرز کے طور پر استوار ہوں، ہم تیل، گیس اور قابلِ تجدید توانائی کے شعبوں میں مشترکہ منصوبوں کو تلاش کرنے کے خواہاں ہیں تاکہ پائیدار ترقی اور عوام کے لئے سستی توانائی کو یقینی بنایا جا سکے۔
وفاقی وزیر نے امریکی ناظم الامور کا شکریہ ادا کیا کہ انہوں نے اگلے ہفتے ہونے والے پاکستان منرلز انویسٹمنٹ فورم میں امریکی اعلیٰ سطحی وفد کی شرکت کے لئے ذاتی طور پر کاوش کی۔ اس فورم میں امریکہ کے ایکٹنگ اسسٹنٹ سیکرٹری برائے جنوبی و وسطی ایشیا ایرک میئر شرکت کریں گے جو طویل عرصے بعد اسٹیٹ ڈیپارٹمنٹ کے اسسٹنٹ سیکرٹری لیول کا ایک اہم دورہ ہوگا۔ نیتالی بیکر نے پاکستان کی معاشی بحالی اور اہم اصلاحات کے کامیاب عمل کو سراہا۔
انہوں نے وزیراعظم شہباز شریف اور ان کی کابینہ کو اس کامیابی پر مبارکباد پیش کی۔ انہوں نے کہا کہ امریکہ کا پاکستان کے ساتھ سکیورٹی کے شعبے میں مثبت تعاون جاری ہے، امریکی صدر ڈونلڈ ٹرمپ نے اپنے پہلے خطاب میں وزیراعظم شہباز شریف کی قیادت میں پاکستان کی سیکورٹی کاوشوں کو سراہا، اب وقت آگیا ہے کہ اس تعلق کو وسعت دی جائے اور اسے ایک نئی سطح پر لے جایا جائے۔
انہوں نے وزیراعظم شہباز شریف کی قیادت میں اصلاحات کے راستے پر پاکستان کو مکمل تعاون کی یقین دہانی کرائی۔ ملاقات میں دونوں رہنماؤں نے باہمی توانائی کے اہداف کو آگے بڑھانے اور پاک-امریکہ تعاون کے نئے راستوں کو تلاش کرنے کے مشترکہ عزم کا بھی اظہار کیا۔
