اسلام آباد(رپورٹنگ آن لائن)وفاقی وزیر برائے ریلوے محمد حنیف عباسی نے ہنگو میں فتنہ الہندوستان کے دہشت گرد حملے کی شدید مذمت کرتے ہوئے کہا ہے کہ دشمن کے ناپاک عزائم کبھی کامیاب نہیں ہوں گے، قوم دشمن کے ہر وار کے سامنے سیسہ پلائی دیوار بن کر کھڑی ہے۔
پیر کو اپنے بیان میں محمد حنیف عباسی نے کہا کہ ہنگو میں دہشت گردوں کے بزدلانہ حملے میں وفاقی ریزرو پولیس کے 3 جوانوں نے جامِ شہادت نوش کیا،قوم کے بہادر شہدا کو خراجِ تحسین اور سلامِ عقیدت پیش کرتے ہیں۔ انہوں نے شہدا کے لواحقین سے دلی ہمدردی اور گہرے رنج و غم کا اظہار اورزخمی اہلکاروں کی جلد صحت یابی کے لیے دعا کی۔
ا ن کا کہنا تھا کہ شہدا کی قربانی اور جرات ہمیشہ یاد رکھی جائے گی، شہداء کا خون کبھی رائیگاں نہیں جائے گا۔ وفاقی وزیر نے کہا کہ قوم، فوج اور پولیس مل کر دشمن کو ناکام بنائیں گے، فتنہ الہندوستان کے خلاف جہادِ حق جاری رہے گا۔
