اسلام آباد(رپورٹنگ آن لائن)وفاقی وزیر ریلوے اعظم خان سواتی نے یوم آزادی پر قوم کو مبارک باد دیتے ہوئے کہا ہے کہ قائداعظم کے اصولوں اور علامہ اقبال کے ایک جمہوری، متحمل اور ترقی یافتہ ملک کے خواب کی تکمیل کے لئے اپنے عزم کا اعادہ کرتے ہیں۔
اپنے بیان میں اعظم سواتی نے کہاکہ پاکستان اور پوری دنیا میں مقیم پاکستانیوں کو یوم آزادی پر مبارک دیتا ہوں۔انہوںنے کہاکہ75واں یوم آزادی مناتے ہوئے بابائے قوم اورقیام پاکستان کی جدوجہد کرنے والی نسلوں کو خراج عقیدت پیش کرتے ہیں۔ وزیر ریلوے نے کہاکہ ان لاکھوں مسلمانوں کو خراج تحسین پیش کرتے ہیں جنہوں نے قیام پاکستان کے لئے ہجرت کی اور عظیم قربانیاں دیں۔
اعظم خان سواتی نے کہاکہ قائداعظم کے اصولوں اور علامہ اقبال کے ایک جمہوری، متحمل اور ترقی یافتہ ملک کے خواب کی تکمیل کے لئے اپنے عزم کا اعادہ کرتے ہیں۔ انہوںنے کہاکہ پاکستان کی تعمیر و ترقی کے لئے بھرپور کاوشیں کرنے پر پاکستانی قوم لائق تحسین ہے۔
انہوںنے کہاکہ ہمیں اپنے نوجوانوں کی صلاحیتوں پر پورا اعتماد ہے،پاکستان نے کورونا وبا سے نمٹنے میں ترقی پزیر ممالک سے بھی بہتر کارکردگی دکھائی ہے۔ وزیر ریلوے نے کہاکہ ہم نے مقبوضہ جموں وکشمیر میں بے گناہ کشمیریوں پربھارتی مظالم اور انسانی حقوق کی سنگین خلاف ورزیوں کو بھرپور انداز میں دنیا میں اجاگر کیا ہے۔ انہوںنے کہاکہ آئیے اتحاد، یقین محکم اور نظم وضبط کے اصولوں پر عمل پیرا ہوتے ہوئے پاکستان کو درپیش مسائل کا سامنا کریں۔
