اسلام آ باد (رپورٹنگ آن لائن) وزیر خزانہ شوکت ترین کی زیر صدارت اقتصادی رابطہ کمیٹی (ای سی سی) کا اجلاس کل جمعرات کو ہوگا اجلاس میں 8 نکاتی ایجنڈے پر غور کیا جائے گا۔
ذرائع کے مطابق ٹماٹر اور پیاز کی برآمد پر پابندی لگائے جانے کا امکان ہے۔ وزارت خوراک کی جانب سے برآمد پر پابندی کی سمری اجلاس میں پیش کی جائے گی۔ جلاس میں نیشنل ریمیٹنس لائیلٹی پروگرام کی سمری پیش کی جائے گی اور یوٹیلٹی اسٹورز کارپوریشن کیلئے گندم کی دستیابی پر غور کیا جائے گا۔
وزارت خوراک کی جانب سے کپاس کی قیمتوں کی تعین کیلئے بنائی گئی کمیٹی کی رپورٹ پیش کی جائے گی، آزاد جموں و کشمیر کیلئے گندم کی فراہمی کی سمری بھی ایجنڈے کا حصہ ہے۔ اس کے علاوہ اجلاس میں چھوٹے ہائیڈرو پاور منصوبوں کیلئے پاور جنریشن پالیسی 2015 کے تحت سیکیورٹی معاہدے کی منظوری کا امکان ہے۔
