اسلام آباد (رپورٹنگ آن لائن)وزیر اعظم محمد شہباز شریف نے پاکستانی افرادی قوت کو عالمی سطح پر مسابقت کیلئے بین الاقوامی سرٹیفیکشنز کی فراہمی کو خوش آئند قرار دیتے ہوئے خلیجی ممالک میں پاکستانی افرادی قوت کی کھپت کیلئے وزارت خارجہ اور وزرات سمندر پار مقیم پاکستانیز کو اقدامات تیز کرنے کی ہدایت کی ہے۔
پیر کو وزیر اعظم آفس کے میڈیا ونگ کی طرف سے جاری بیان کے مطابق وزیر اعظم محمد شہباز شریف کی زیر صدارت ملک میں پیشہ وارانہ تربیت کے نئے متعارف کردہ ایکوسسٹم پر جائزہ اجلاس منعقد ہوا جس میں نیوٹیک کے تحت جاری تربیتی پروگرامز کا تفصیلی جائزہ لیا گیا۔ وزیراعظم محمد شہباز شریف نے نیوٹیک کی حالیہ کارکردگی پر اطمینان کا اظہار کرتے ہوئے تکنیکی و فنی تربیتی پروگرامز کے نئے اہداف کا تعین کرنے اور اپرینٹس شپ قانون پر عملدرآمد یقینی بنانے کی ہدایت کی۔ وزیر اعظم نے پاکستانی افرادی قوت کو عالمی سطح پر مسابقت کیلئے بین الاقوامی سرٹیفیکشنز کی فراہمی کو خوش آئند امر قرار دیتے ہوئے ہدایت کی کہ خلیجی ممالک میں پاکستانی افرادی قوت کی کھپت کیلئے وزارت خارجہ اور وزرات سمندر پار مقیم پاکستانی اقدامات میں تیزی لائیں۔
انہوں نے کہا کہ پاکستانی نوجوان افردای قوت صلاحیتوں سے بھرپور ہے، ان کی صلاحیتوں کو بروئے کار لانے کیلئے نیوٹیک کے ذریعے ایک مفصل پروگرام کا آغاز کیا۔انہوں نے کہا کہ اللہ کے فضل و کرم سے نیوٹیک کے تحت تکنیکی و فنی تربیتی پروگرامز کے مثبت نتائج سامنے آرہے ہیں۔ وزیر اعظم نے نیوٹیک کے تمام پارٹنر تربیتی اداروں میں زیر تربیت طلباء اور اساتذہ کیلئے بائیو میٹرک نظام کے تحت حاضری کا نظام لاگو کرنے کی ہدایت کی۔ انہوں نے صوبائی اداروں کے ساتھ تعاون کو یقینی بناتے ہوئے نیوٹیک کے پروگرامز کو وسعت دینے کی بھی ہدایت کی تاکہ زیادہ سے زیادہ افرادی قوت کو تربیت فراہم کی جا سکے۔
وزیر اعظم نے کہا کہ بین الاقوامی سطح پر زیادہ مانگ والے ہنر کے حوالے سے نوجوانوں کو بین الاقوامی سرٹیفیکشن کے ساتھ تربیت کی فراہمی اولین ترجیح ہے۔ وزیر اعظم نے حکم دیا کہ نیوٹیک کے تحت جن اداروں کی کارکردگی اطمینان بخش نہیں، ان کی رکنیت معطل کرکے کارروائی کی جائے، نیوٹیک کے نظام کی مکمل ڈیجیٹائیزیشن و آن لائن مانیٹرنگ کے نظام کو مزید موثر بنایا جائے۔ اجلاس میں نیوٹیک کے ساتھ کام کرنے والے نجی شعبے کے تھرڈ پارٹی ویلڈیٹرز، صنعتی شعبے کے شراکت دار، پیشہ ورانہ فرمز، چیمبرز آف کامرس کے نمائندے، کاروباری ایسوسی ایشنز کے نمائندے اور مصنوعی ذہانت و انفارمیشن ٹیکنالوجی شعبے کے ماہرین نے شرکت کی۔
اجلاس کو بتایا گیا کہ نیوٹیک کی جانب سے وزیر اعظم کے تفویض کردہ تربیتی پروگرامز کے اہداف کا حصول یقینی بنایا جا چکا، نیوٹیک اپنے پیشہ ورانہ تربیتی پروگرامز کی تھرڈ پارٹی ویلیڈیشن کو یقینی بنا رہی ہے جس میں تربیتی پروگرامز میں طلباء و طالبات کی بائیومیٹرک حاضری کے ساتھ ساتھ ٹرینرز کے اعلی معیار کو بھی یقینی بنایا جا رہا ہے۔ اجلاس کو بتایا گیا کہ نیوٹیک کے تحت پاکستان کے پہلے سکل بیسڈ بانڈ کا اجراء کیا جا چکا ہے جس کے تحت نجی شعبے سے پیشہ ورانہ تربیت کیلئے نتائج کی بنیادوں پر فنڈنگ لی جائے گی۔ اجلاس کو بتایا گیا کہ انفارمیشن ٹیکنالوجی، زراعت، فِن ٹیک، کان کنی، سیاحت، سپورٹس، ہاسپیٹیلٹی، چپ بلڈنگ کے ساتھ ساتھ بین الاقوامی سطح پر ڈیمانڈ کے اعتبار سے تربیتی پروگرامز اس وقت نیوٹیک کے تحت ملک بھر میں جاری ہیں۔
پاکستان کی تاریخ میں پہلی مرتبہ نیوٹیک کے تکنیکی و فنی تربیت کے تمام پروگرام انڈسٹری کی ضروریات سے ہم آہنگ کیے جا چکے ہیں۔ اس مقصد کیلئے ملک بھر سے 148 صنعتوں کو پروگرامز میں شامل کیا گیا ہے۔ اس کے علاوہ ملک بھر میں مدرسہ جات میں بھی تربیتی پروگرامز کا اجراء کیا گیا ہے۔ اجلاس کو ان پروگرامز میں کامیابی سے فارغ التحصیل ہونے والے طلباء و طالبات کے بارے بھی بتایا گیا۔ اجلاس کو اعداد و شمار پر بریفنگ دیتے ہوئے بتایا گیا کہ گزشتہ برس نیوٹیک کے ذریعے 1 لاکھ 46 ہزار افراد نے تربیت حاصل کی جبکہ 15 ہزار سے زائد لوگوں کو بین الاقوامی سرٹیفیکیشنز فراہم کی گئیں۔
تکامل کے ذریعے 3 لاکھ سے زائد لوگوں نے تربیت حاصل کی جبکہ 2 لاکھ 80 ہزار سے زائد لوگ سعودی عرب میں اس نظام کے ذریعے برسر روزگار ہوئے۔ اس کے ساتھ ساتھ 350 سے زائد اداروں کی جانچ پڑتال کے بعد انہیں نیوٹیک کی جانب سے بین الاقوامی سطح کی تربیت فراہم کرنے کا لائسنس فراہم کیا گیا۔ اجلاس کو مزید بتایا گیا کہ 10 ہزار سے زائد لوگوں کو صنعتوں کے حساب سے پیشہ ورانہ تربیت کا پائلٹ پراجیکٹ کے اجراء کے علاوہ 2600 نئے اداروں کی رجسٹریشن کی گئی۔
اجلاس کو بتایا گیا کہ تربیت فراہم کرنے والے اداروں کو ادائیگی کیلئے نتائج کو مدنظر رکھا جاتا ہے۔ اجلاس کو گوگل، مائیکروسافٹ و دیگر بین الاقوامی سرٹیفیکیشن اداروں کے حوالے سے بھی بریفنگ دی گئی۔ اجلاس کو وزیرِ اعظم کی جانب سے نیوٹیک کو تفویض کردہ تمام اہداف کو حاصل کرنے کے بارے میں بھی آگاہ کیا گیا۔ وزیر اعظم نے نیوٹیک کی کارکردگی پر اطمینان کا اظہار کرتے ہوئے مستقبل کیلئے مزید بہتری کے حوالے سے نئے اہداف کے تعین کی ہدایت کی۔
