اسلام آباد(رپورٹنگ آن لائن) وزیر اعظم عمران خان نے وفاقی کابینہ کا اجلاس کل منگل کوطلب کرلیا ہے ،7نکاتی ایجنڈا جاری کر دیا گیا ہے ۔ذرائع نے بتایا کہ کورونا وائرس کے بڑھتے ہوئے کیسز کے باعث وزیر اعظم ہاﺅس میں آج ہونے والا کابینہ اجلاس ویڈیو لنک کے ذریعے منعقد ہوگا،وفاقی کابینہ کا سات نکاتی ایجنڈا کابینہ ارکان کو بھجوا دیا گیا، اجلاس میں اہم ملکی اور قومی امور پر غور ہو گا،
اجلاس میں معاشی ،سیاسی اور قومی سلامتی کے امور زیر غور آئیں گے جبکہ کابینہ اجلاس میں لداخ تنازعہ پر چین اور بھارت کشیدگی پر بات ہوگی ۔اجلاس میں کورونا وائرس کی صورتحال پر بھی غور کیا جائے گا،وفاقی کابینہ افغان مہاجرین کے پاکستان میں قیام میں توسیع کا فیصلہ بھی کرے گی اور افغان مہاجرین کی توسیع سے متعلق وزارت سیفران کی سمری پیش ہو گی۔وفاقی کابینہ اقتصادی رابطہ کمیٹی (ای سی سی) اور توانائی پر کابینہ کمیٹی کے فیصلوں کی توثیق کرے گی جبکہ قصر ناز کراچی اور چمبہ ہاوس لاہور کو لیز پر دینے کا معاملہ بھی کابینہ ایجنڈے میں شامل ہو گا۔
اجلاس میں پاکستان میں سیٹیلائٹ سروسز کی اجازت سے متعلق وزارت آئی ٹی پالیسی ہدایات پیش کرے گی۔ اس کے علاوہ محکمہ موسمیات کے تمام ملازمین پر لازمی مینٹیننس ایکٹ کے نفاذ میں توسیع کا معاملہ ایجنڈے میں شامل ہو گا۔کابینہ اجلاس کو ننکانہ صاحب میں زمینوں کی نظر ثانی شدہ قیمتوں پر چیئرمین متروکہ وقف املاک بورڈ بریفنگ دیں گے
