کراچی (رپورٹنگ آن لائن)میئر کراچی مرتضیٰ وہاب نے ایم کیو ایم پاکستان کو مل کر کام کرنے کی پیشکش کرتے ہوئے کہا ہے کہ فاروق بھائی میرے ساتھ چلیں، جس طرح کہیں گے کام کریں گے۔
یوتھ کلب میں محکمہ کھیل کی جانب سے پاکستان یوتھ پارلیمنٹ کی تقریب کا انعقاد کیا گیا جہاں میئر کراچی مرتضی وہاب نے پینل ڈسکشن میں شرکت کی۔خطاب کے دوران میئر مرتضیٰ وہاب نے کہا کہ گرواؤنڈ ریلیٹی دیکھ کر فاروق ستار، مصطفی کمال اور خالد مقبول کام کرنا چاہتے ہیں تو تیار ہوں۔انہوں نے کہا کہ ایم کیو ایم پاکستان والوں سے کہتا ہوں کہ آئیں مل کر کام کریں، لڑائی کرنے سے معاملات حل نہیں ہوں گے، باتیں اور پریس کانفرنس کرنے سے خدمت نہیں ہوتی۔
مرتضی وہاب نے کہا کہ کراچی کا سب سے بڑا مسئلہ پینے کے پانی کا ہے، فاروق ستار پانی کہاں سے لے کر آئیں گے؟انہوں نے کہا کہ لاہور میں زیرِ زمین میٹھا پانی موجود ہے، مگر یہاں نہیں ہے، پانی کے مسئلے پر لاہور کی مثال کراچی میں نہیں دے سکتے، بحثیت شہری ہم اپنا فرض نہیں ادا کرتے، جب سب اپنے فرائض نبھانے لگیں گے تو مسائل حال ہو جائیں گے۔
مرتضی وہاب نے کہا کہ کے ایم سی کی 106 سڑکوں کے علاوہ اندرونی سڑکوں پر بھی کام ہو رہا ہے، سیاسی جماعتیں آتی اور چلی جاتی ہیں، وہی سیاسی جماعتیں رہتی ہیں جو عوام کے حقوق پر بات کرتی ہیں، ہم کام کرنا چاہتے ہیں۔مرتضی وہاب نے کہا ہے کہ ایم کیو ایم وزیرِ اعظم کو کہے کہ وفاق کراچی کی مدد کرے، ہر سیاسی جماعت کو کہتا ہوں کہ ہمارے دروازے کھلے ہیں، وزیرِ اعظم سے کہتا ہوں کراچی کے لیے خزانے کھولیں، کراچی کو 15 ارب نہیں 1500 ارب روپے ملنے چاہئیں، ڈیولپمنٹ کسی اور شہر کو زیادہ ملتی ہے کراچی کو نہیں ملتی۔
انہوں نے کہا کہ اسلام باد میں بیٹھے ہوئیحضرات کراچی کے لیے اپنا دل بڑا کریں، ملک بھر میں وفاقی حکومت موٹر وے بنا رہی ہے، وفاق، سکھر، حیدرآباد موٹر وے کیوں نہیں بنا رہی؟ پورے ملک کا موٹر وے وفاق بنا دیتی ہے، سکھر حیدرآباد موٹر وے نہیں بناتی۔میئر مرتضی وہاب نے کہا کہ کوئی بھی شخص جو اچھے فیصلے کر رہا ہو وہ لیڈر ہو سکتا ہے۔
انہوںنے کہا کہ ہماری پارٹی پیپلز پارٹی کے لیڈر بلاول بھٹو زرداری جوان ہیں، ہمارے معاشرے میں بہت ناامیدی پیدا ہو گئی ہے، پاکستان کے سارے لوگ ملک چھوڑ کر تو نہیں جا سکتے۔مرتضی وہاب نے کہا کہ لیڈر شپ اور نوجوان نسل میں تعلق بنانے کی ضرورت ہے، بلاول بھٹو پی ڈی ایم حکومت بنانے کے لیے کراچی سے اسلام آباد نکلے ہیں۔مرتضی وہاب نے کہا کہ سوئی گیس کمپنی گیس نہیں دیتی مگر سڑکیں کھود کر چلی جاتی ہے۔
