اسلام آباد (رپورٹنگ آن لائن)وفاقی وزیر برائے انسانی حقوق سینیٹر اعظم نذیر تارڑ سیمملکتِ نیدرلینڈز کے سفیر ہائی ایکسی لینسی رابرٹ یان سیگرٹ نے جمعہ کو یہاں ملاقات کی جس میں انسانی حقوق کے فروغ اور تحفظ سے متعلق جاری اقدامات پر تبادلہ خیال اور دوطرفہ تعاون کو مزید مضبوط بنانے پر گفتگو کی گئی۔وزارت انسانی حقوق سے جاری بیان کے مطابق وفاقی وزیر نے سفیر کا خیرمقدم کیا اور پاکستان کی انسانی حقوق کے شعبے میں ترجیحات کی تکمیل کے لیے نیدرلینڈز کی مستقل معاونت اور دلچسپی کو سراہا۔
دونوں فریقین نے مساوات، شمولیت اور تمام شہریوں کی فلاح و بہبود کے فروغ کے مشترکہ عزم کا اعادہ کیا۔سفیر نے انسانی حقوق کے ایجنڈے پر عملدرآمد کے حوالے سے پاکستان کی کاوشوں کو سراہا اور آئینی ضمانتوں، خصوصاً مذہبی آزادی اور عقائد کی آزادی کے فروغ کے لیے حکومتی عزم کی تعریف کی۔ اس موقع پر وفاقی وزیر نے پاکستان کے متنوع اور شمولیتی سماج کا حوالہ دیتے ہوئے بتایا کہ ملک میں تمام مذہبی برادریوں کے حقوق آئینِ پاکستان کے تحت محفوظ ہیں۔ وزیر نے حالیہ قانون سازی سے بھی آگاہ کیا، جس میں نیشنل کمیشن برائے اقلیتی حقوق بل کا تعارف شامل ہے، جو اقلیتوں کے حقوق کے تحفظ، بین المذاہب ہم آہنگی کے فروغ اور قومی ترقی میں اقلیتی برادریوں کی بھرپور شمولیت کو یقینی بنانے کے لیے ایک اہم اقدام ہے۔
وفاقی وزیر نے نیشنل ایکشن پلان برائے انسانی حقوق پر پیش رفت سے بھی آگاہ کیا، جو پالیسی اصلاحات، انصاف تک رسائی میں بہتری، بین الاقوامی معاہدوں پر عملدرآمد اور انسانی حقوق کے اداروں کے تقویت جیسے اقدامات کا احاطہ کرتا ہے۔ انہوں نے قومی کمیشن برائے انسانی حقوق (این سی ایچ آر )،قومی کمیشن برائے وقار نسواں (این سی ایس ڈبلیو) اور قومی کمیشن برائے حقوق اطفال (این سی آر سی) جیسے خودمختار اداروں کے اہم کردار کو بھی اجاگر کیا۔ اس کے علاوہ خواتین، بچے، سینئر شہری، خواجہ سرا اور معذور افراد جیسے کمزور طبقات کے تحفظ سے متعلق حکومتی اقدامات پر بھی گفتگو کی گئی۔دونوں جانب سے انسانی حقوق کے فروغ اور تحفظ کے لیے قریبی رابطہ کاری اور تعمیری مکالمہ جاری رکھنے کے عزم کا اظہار کیا گیا۔ ملاقات کا اختتام باہمی ترجیحات پر مزید گہرے تعاون کے اعادے پر ہوا۔
