اسلام آباد ( رپورٹنگ آن لائن)وفاقی وزیرداخلہ محسن نقوی نے ایف ایٹ جناح ایونیو انٹرچینج اور ایف ٹین راؤنڈ آباؤٹ پراجیکٹس کا دورہ کیا،وزیر داخلہ محسن نقوی نے 42 روز میں انڈر پاس کی تکمیل کے بعد فلائی اوور پراجیکٹ کو بھی ریکارڈ مدت میں مکمل کرنے کا ٹاسک دیدیا۔
فروری کے دوسرے ہفتے تک فلائی اوور کو ٹریفک کیلئے کھول دیا جائے گا۔انہوں نے جناح ایونیو انٹرچینج فلائی اوور پراجیکٹ پر کام کی رفتار تیز کرنے کی ہدایت کرتے ہوئے کہا کہ سپیڈ کے ساتھ معیار کو ہرصورت برقرار رکھا جائے۔ وزیرداخلہ نے دونوں پراجیکٹس کی جلد تکمیل کے لیے احکامات دیتے ہوئے کہا کہ تعمیراتی کاموں کے ساتھ پراجیکٹس کے اطراف بیوٹیفکیشن کا کام جاری رکھا جائے۔
انہوں نے ایف ایٹ جناح ایونیو انٹرچینج اور ایف ٹین راؤنڈ آباؤٹ منصوبوں پر جاری تعمیراتی سرگرمیوں کا جائزہ لیا۔ وزیرداخلہ نے دونوں پراجیکٹس پر ہونے والی پیشرفت کا معائنہ کیا۔ جناح ایونیو انٹرچینج پر فلائی اوور کے باکس گرڈر کی بیس سلیب مکمل کر لئے گئے ہیں۔ وزیر داخلہ نے منصوبوں کے اطراف شجرکاری اور ہارٹیکلچر کے کام کو مقررہ مدت میں مکمل کرنے کی ہدایت کی۔
وزیرداخلہ محسن نقوی نے ایف ٹین راؤنڈ آباؤٹ توسیعی پراجیکٹ پر کام کی رفتار کا جائزہ لیتے ہوئے پراجیکٹ کو فروری کے پہلے ہفتے میں مکمل کرنے کا ٹاسک دیا۔ محسن نقوی نے کہا کہ منصوبوں کی تکمیل سے شہریوں کو ٹریفک جام سے نجات ملے گی، شہریوں کو آمدورفت میں بہت سہولت ملے گی۔ سگنل فری کوریڈور پر سفر سے وقت اور ایندھن کی بچت ہوگی۔ چیئرمین سی ڈی اے محمد علی رندھاوا نے منصوبوں پر پیشرفت پر بریفنگ دی۔ وفاقی سیکرٹری داخلہ محمد خرم آغا، نیسپاک کے متعلقہ حکام اور اعلی افسران بھی اس موقع پر موجود تھے۔
