اسلام آباد(رپورٹنگ آن لائن)وفاقی وزیرداخلہ محسن نقوی سے امریکہ کے سفیر ڈونلڈ بلوم نے الوداعی ملاقات کی۔ ملاقات میں باہمی دلچسپی کے امور اور پاک امریکہ تعلقات کے حوالے سے تبادلہ خیال کیا گیا۔
وفاقی وزیرداخلہ محسن نقوی نے پاک امریکہ تعلقات کے فروغ کے لئے امریکی سفیر ڈونلڈ بلوم کی خدمات کو سراہا اور ان کے لئے نیک خواہشات کااظہار کیا۔ امریکی سفیر ڈونلڈ بلوم نے پاکستان میں حالیہ دہشتگرد واقعات کی مذمت کی۔ وزیر داخلہ محسن نقوی نے کہا کہ دہشتگردی ایک عالمی مسئلہ ہے، عالمی برادری کو ملکر کر دہشتگردی کے مکمل خاتمے کیلئے لائحہ عمل بنانا ہو گا
۔ وفاقی وزیرداخلہ محسن نقوی نے کہا کہ کسی بھی غیر قانونی غیر ملکی کو پاکستان میں رہنے کی ہر گز اجازت نہیں دی جائے گی۔ امریکی سفیر ڈونلڈ بلوم نے کہا کہ پاکستان میں تعیناتی کے دوران تمام اداروں کا بھر پور تعاون حاصل رہا۔ وفاقی سیکرٹری داخلہ محمد خرم آغا اور امریکی ڈپٹی ہیڈ آف مشن نیٹلی بیکر بھی اس موقع پر موجود تھیں۔